清新黃桃加洲反卷

 

我係一個勁熱底既人, 我好多年未試過著褸, 冬天通常都係著

厚外套就好暖, 咁夏天對我黎講簡直係極刑, 所以我老公成日

都叫我冷氣狗,我呢隻冷氣狗竟然勇猛地於中午出銅鑼灣, 

當我老公自認為好有型咁揸住電單車黎接我時, 我見到跟隨住

佢係一股熱氣, 當我帶上頭盔的一刻, 嘩~血.滴.子!!個頭盔比

太陽晒過, 就好似將一個煲滾既煲反轉戴上頭一樣!聽到我一

番偉論咁形容佢2奶後, 我老公已開始碎碎唸,

我隱約聽到係 : 唔中意唔好坐lor,車埋你仲咁多野講...

返到屋企, 咩都唔想食, 唔想食熱,唔想食油, 當絕望時,

雪櫃總會比到靈感你既, 就用物資整壽司啦!唔好以為面頭係蟹籽

其實係碎甘荀, 但口感都係脆脆, 信我!唔講係無人估到架

整裝待發, 先把材料預備好!

 

 整反卷好好玩!

1.先把醋飯舖上紫菜再舖上保鮮紙
2. 反轉放上你喜愛既餸菜, 我既係醃黃瓜, 青瓜絲, 罐頭桃
3. 用竹蓆卷好切件,取走保鮮紙放入甘荀碎翻滾, 攪惦

 

食後感 : 以為用桃好怪, 原來都好夾醋飯, 整左4條, 例牌食晒,yeah!