忌廉蕃茄球拍粉

 

今日響公司行黎行去做野時, 突然聽到幾個男同事驚叫, 睇下咩事, 原來公司有一忽位,突然落暴雨!無錯, 係暴雨!即打去管理處, 原來樓上爆水喉!因為同一個位置大家都係廁所位, 而佢個廁所係一向都無人用, 所以爆左一陣先有人發現, 亦因為咁, 已浸透我地個天花板, 仲變成暴雨淋下。雖然係咁, 唔知點解我突然勁想大笑, 見到到個男同事大叫, 我走埋去叫佢收聲兼問佢想點, 佢話佢成頭水, 我一聽終於忍唔住笑到爆左, 笑係好容易感染人, 笑既圈子愈來愈大, 成班人好似喪屍咁, 唔知為左咩笑到企唔直...haha...今次廁所又唔知做工程做幾耐, 無廁所用超麻煩。

呢個星期都無咩煮飯,攰到死, 但仍然每日都出到post, 好勤力呢!因為想響yblog at least砌夠100篇, 好無聊既堅持!大家而家都過晒黎呢度, 其實我的yblog還是同步update呢! 每次都copy過去, 唔...原來我真係一個好stubborn既人..ha..今日要清埋最後為打風而買既物資:
唔紅唔大個唔多汁既蕃茄和瘦瘦的露荀!

 我唔想為呢兩樣野花心思去煮, 唸起上次逛超級市場買左兩包好得意既意粉, 飛機同球拍

 飛機一買返黎已經煮左, 但煮法唔特別,只係例牌用磨菇and牛肝菌去煮,而且d飛機墜晒機好多爛左, 所以費是post。今次用球拍, 睇下球拍幾可愛!

材料 :
1. 蕃茄
2. 露荀
3. 餸(我用左冰箱食剩既素丸)

調味料 :
1. 茄汁 - 1湯匙
2. 糖(視乎個蕃茄有幾酸,我用左代糖1小包)
3. 素雞粉 - 1茶匙
4. 豉油丁點
5. 奶/cream

做法:
1. 球拍粉照包裝加少少鹽和油大滾水滾11分鐘,盛起備用
2. 露荀切小段, 中火爆至香加少少素雞粉,平時我會加白酒和糖焗, 呢個係我覺得最好味既煮法, 但上次煮時, 比我自己邊煮邊飲晒D酒無買返..haha..所以今次用左味醂, 夠甜唔洗加糖焗至收乾水盛起備用。P.S.白酒+糖好味過用味醂, 因為有果香味!
3. 素丸切粒略炒備用
4. 蕃茄切粒(我會留皮有益D)略炒,加少許水滾至出味
5. 倒入球拍兜勻
6. 除奶/cream外, 倒入全部調味料兜勻
7. 最後倒入露荀和素丸兜勻
8. 倒入奶/cream,我今之係用cream, 蕃茄加入奶/cream, 完全將味道提昇!

睇下球拍無爛!仲好索汁!