失魂天- 椰菜花濃湯

 

一早流流就比dingding嘈醒, 看看個鐘, 喂呀!7:30就叫醒我!放假一定要自然醒, 好殘忍呀dingding!此貓已被訓練成鬧鐘, 叫我呢個超級賴床怪起身, 首先會像怨婦一樣在我耳邊拖長叫, 但頑強的賴床怪又點會咁容易被擊倒!因為我係趴響度訓覺, 行動會升級跳上我的背脊正宗cat walk,但對於賴床要一小時的我, 睡意還濃不願下床, 最後一招萬試萬靈, 會輕咬我的耳仔,腳趾,手指, 需然唔係好痛, 但呢種酥酥痕痕既感覺令我不得不起身, 而此鬧鐘貓必定如佢所願埋位等待佢應得的零食!但可惜佢唔識睇日曆, 明明係假期都要7:30起身!當我餵完貓後, 倒在梳化繼續追夢至8:30, 突然醒起,頂!今日要返工!明明臨睡前都記得今日要返半天!極速梳洗衝出門口, 幸好立刻有小巴, 下車時本打算去買杯回魂咖啡, 先發覺唔記得帶銀包!肯定尋日落街買完野唔記得放返落手袋!唉..反正返半日, 惟有等放工先食brunch!返到公司可憐夸夸的問同事借了$200, 因為唔想放工仲要返上樓再落街買野囉!

好不辛苦捱到放工, 拖著咕咕聲的肚搭上我近日最愛的巴士河, 到站時一支箭衝去買野食, 司機叔叔突然叫住我, 因為我坐司機隔離近門口位,
司機 : 點解唔攞埋手袋落車?(問得好奇怪)
我: 係咯,點解呢?(仲會係點解呢?)
司機 :我知啦, 你一定係唔記得!(樣子甚滿意)
我: 嗯, 你真係叻(哈哈)
我比呢位叔叔笑死!但係咩事呢?我今日個靈魂去左邊呢?

因 為颱風天兔既關係, 講到如果吹正會掛10號風, 事關我住既大廈一梯兩伙, 可而知佢係一條好瘦既大廈,而四面都無樓, 變左佢係一枝獨"瘦"咁, 加上我住響海側邊, 平時好地地都超大風, 所以每次打風如果食正, 條樓都會極度搖晃, 門會自己閂埋, 試過坐有鏕的椅子打字, 打打下發現人枱係分開, 因為自己移左位!初初黎住, 仲以為自己頭暈, 點知聽鄰居講先知原來係條樓郁緊!未住過呢種樓既人真係好難想像!不過咁, 咁樣係正常, 如果佢唔郁, 就會斷架啦!我有唸過如果今次真係太太太勁的話, 我附近有兩間酒店和一間service apartment, 可以過去避難!咁因為屋企無罐頭呀麵呀呢D野, 所以我就拎住同事借比我既$200去買定呢兩日既野食啦!我承認我唔係精明眼, 平時買野其實唔係太過份係無咩格價, 亦唔會數銀包有幾錢, 而我自以為$200能買偏天下時, 我爭D唔夠錢比囉!我真係要檢討下我係咪要精明一D呢, 定係而家D野係咪真係咁貴呢!

$200就係買左咁多野啦!而我唔夠錢買我既brunch囉!潛埋手袋底D神沙,大拿拿用左$8買左兩個砵仔糕, 餓死我啦!無錢真係太可怕啦!

 

食完砵條糕好似無食野咁好肚餓, 一於早D煲今晚飲既椰菜花濃湯!我未食過椰菜花, 因為我真係覺得佢好樣衰, 但因為近來響餐廳飲過呢款湯,至此念念不忘!
我去左一間我無幫襯過既菜檔幫襯,因為我真係未買過椰菜花既關係, 我問佢點解有咁多黑色點點時, 佢話正常我又信喎, 但返到黎又覺得佢呃我, 都係剪晒佢先!但佢大過個煲喎!咩事呢又!

 

 材料 :
1. 椰菜花 - 1 個
2. 奶 - 1.5盒(因為有半盒係剛飲剩既..hehe)
3. 薯仔 - 1個(中)
4. cream - 湯匙
5. 鹽,糖,黑椒 - 少許

做法 :
1. 用鹽水浸椰菜花半小時
2. 下少許油和大約1茶匙牛油爆炒摘好的椰菜花和已切粒粒的薯仔
3. 加水至和椰菜花成水平線,煲至軟
4. 加入奶,攪拌成湯
5. 加入cream和鹽糖,試味,再滾起時熜火, 食時灑點黑椒

食後感 :好綿好香, 即刻飽晒!
小貼士 : 攪拌完, 要邊煮邊不停攪動, 可否則會好似溶岩咁彈出!