喪屍沙爹粉絲節瓜

 

 平時既星期六日已經好夜訓, 尋晚唔知點解有少少holiday mood..haha...完全唔眼訓!聽聽下歌望下個鐘, 嘩4:00am!再唔訓真係天光!由7:30開始比ding嘈醒就開始每一個鐘頭起身一次睇下有無落風球, 估唔到呢個風講到咁恐怖, 原來雷聲大, 雨點小, 咁快就走左!OMG!我訓左幾個鐘, 超痛苦!好似喪屍咁爬返公司, 連飲兩杯咖啡先勉強回到1/10個魂魄!我寧願捱肚餓都唔想捱眼訓!打開mail box, 一個e-mail都無, 好明顯好多人未/唔返工!望住成張枱亂到亂葬崗咁, 完全集中唔到精神做野!lunch time 草草食件三文治, 即刻趴左響枱訓著左, 仲流埋口水!hahahah..痴線!好在我個位唔會有人行過唧!果然唔係18,22差好遠!想起以前飲酒飲通霄, 去飲埋早茶再返工, 放工再去玩通霄, 夜夜笙歌從來唔覺攰, 而家只係訓夜少少已經變喪屍, 莫非真係有歲月神偷?!

返到屋企, 望住D為左颱風而買既食物無奈到極點!幾唔想煮都要煮鬼左佢!突然好想食D濃味野, 用我最愛既沙爹醬求求其其煮個粉絲, 好明顯比鬼迷, 煮左咁鬼多, 可以唔煮飯剩食都得!不過真係好好味, 我超愛呢隻沙爹醬, 不枉我食左佢十幾年!飽晒!其實唔需要食肉都可以好飽肚, 有營養, 亦不需要一定清淡, 其中牛肉係我堅持就算餓死都唔食既肉, 但至於魚呢...噢..我又唸起咖哩魚蛋同三文魚生tim...

材料 :
1. 粉絲
2. 豆腐卜
3. 節瓜

調味料:
1. 沙爹醬 - 兩湯匙
2. 生抽/老抽 - 各1 茶匙
3. 糖 - 1茶匙

 

做法 :
1. 粉絲浸軟
2. 豆腐卜出水去油,揸乾剪開一半
3. 節瓜去皮切件
4. 下油先爆節瓜至香, 下豆卜
5. 下調味料,和水至蓋過瓜, 滾起下粉絲
6. 大火滾多5分鐘熄火蓋上至索晒汁,食得!