出關啦- 肉桂卷

我係一個emotional既人, even平時我中意吱吱喳喳, 但有時我會好想做孤獨精, 唔想同人講野, 只係想自己一個人, 我可以O嘴發呆一整個下午, 又可能一條友去打書釘打到腳痺先走...我有時唸,可能門外在打仗都好, 只要我的孤獨 mode在啟動, 我都係會呆在自己既境界中。對於一D現實型既人, 我呢種人係勁不切實際, ok, 我就係中意自己不切實際!對於佢地黎講, 我係果種有正經嘢唔做, 浪費時間的人, ok, 我就係中意浪費時間, 反正時間係屬於我既!

上星期又係孤獨mode自動啟動既時候, 例牌自困在自家境界中發呆, 好似入左定咁...哈哈...呢排又唔想傾電話連whatsap都唔係好想覆, 連bolg都唔想update唔想瀏覽..哈哈...ok, 不過而家已經閉完關畢啦, 又開始重回我的港女生活..hehe

我好中意食玉桂味既東東, 有日去ikea見到有玉桂卷, 嗱嗱聲買咗一袋返屋企焗, 好香濃既玉桂香, 但太甜lor!多食無益, 咁梗係自己整啦, 可以搏死老命咁落玉桂粉, 本來唸住落d提子乾, 點知原來比老公食鬼晒, 唸起之前響富澤買咗包糖漬橙皮, 又夾喎!!好正正啦!!

材料 :

高筋麵粉 - 250g

低筋麵粉 - 50g

速酵 - 3/4茶匙,
雞蛋 - 1隻

奶 -150ml

糖 - 25g

黑糖 - 15g

無鹽牛油 - 30g
鹽 - 1/4茶匙

1.粉團搓至光滑面可拉起薄膜後發酵至兩倍大。

2.好好篤, 忍唔到手...明顯發好啦!拍出空氣滾圓蓋上保鮮紙休息15分鐘。

3.可能細個阿媽唔肯買泥膠比我玩, 所以我就真係好中意玩整型..hehe

4. 壓成一個大長方形

5. 先灑白紗糖跟著玉桂粉,糖漬橙皮, 份量隨喜好。

6. 捲成一碌

7. 切成8份

8. 放上焗盤,放入焗爐再發酵1個鐘

9. 早10分鐘拎返出黎, 預熱焗爐170度

10. 驚覺唔記得留蛋汁所以無掃蛋汁, 又再加多少少玉桂同橙樣先...hehe

11. 焗18分鐘,放涼。用一湯匙黑糖和一茶匙水混成糖水掃上面, 食得!!la la la...

其實呢,我真係要繼續努力鑽研一下包包, 太高深,而家整既唔可以話難食, 但一定唔係勁好食, 不過自古成功在嘗試, 反正有的是時間, 有一日可能我都可以好似各大師咁輕易整出令人一試難忘既包包(天真mode..哈哈)。