喜事一蘿蘿

早幾日表妹結婚, 大部份老表繼新年後又聚首一堂, 笑到聲沙而歸, 好開心既一晚(其實次次都會聲沙..哈哈)。熱鬧過後回到家在整理相片post上網給媽媽看, 看著每一張相, 大家都笑得好開心。驚覺我們真的都長大了!我十分之慶幸小時侯我們的父母都喜歡聚在一起, 從而令我們的感情從小就培養了出來, 亦好慶幸我們的性格沒有因為年齡漸長而改變, 今天的我們仍然係n年前的我們。

攪笑地我們都有著不同的性格, 有的好嘈好癲;有的好文靜不愛說話;有的讀書好叻好勤力, 有的懶過鬼(好明顯係我!he..)但!把我們放在一起又可以玩埋一堆, 好奇怪!

可能我們都係生長於80年代, 那時的小朋友都無咩壓力, 每個星期去到住在秀茂坪外婆家都會好似食咗興奮劑咁玩到癲, 而我們的舅父們都係豪邁之人, 大家在外婆家跑晒出走廊, 街頭跑到街尾, 外婆亦是極之豪爽的人, 肥肥的往往笑到甩假牙, 有時爆出一兩句粗口笑到我地甩肺。在這種家族長大的孩子又怎能不開心呢!雖然現在少了最重要的一位, 但我知道, 她在天上看到我們幸福快樂, 仍是會笑到甩掉假牙的!

今年家族有好多喜事, 繼表妹結婚後, 4月在美國的堂弟結婚, 9月我將會飛往美國加拿大出席妹妹的婚禮,11月又另一個表妹結婚, 為了開心事而繁忙令人感覺太幸福了!!今個月尾爸爸媽媽會回香港小住, 到時約好了老表們去南丫島一日遊, 唸起都興奮!!

其實我平時的生活都頗有規律, 放工後好少去街, 通常都等到放假先去。而每次gathering我都係勁盡興活躍的人, 可能每次個mood都去得太盡, 熱鬧過後回歸平靜總會令人覺得depress, 呢樣係我覺得最害怕的事!

在我來說, 解決擾人的depress就係寄情於廚房, 做一d自認為高難度既事。今次回到家做了半失敗的伯爵紅茶戚風, 詳細下回再說。