洋蔥磨菇配鮮奶蒸蛋白

聽日就情人節啦, 大家估下我有咩做?浪漫一番?收花?食情人節大餐?no no no!我有更偉大既使命, 就係去攝太歲!!今年我同老公都犯太歲, 本來都無咩理呢d, 點知初十, 我竟然將鎖匙整斷留在鎖匙窿內, 過程又長又煩唔講啦, 總之又破財又要食西北風, 到初十一第一日返工, 響公司行得太快, 刮過垃圾剷角, 刮走左一舊仔肉, 頂佢個肺, 痛到我丫!!都算!點知老公第二日響公司行樓梯時pk!佢不嬲都好小心, okok, 我認輸啦, 就趁初十五攝太歲最後一天, 一定要請半日假去攝太歲, 求個安心麻!希望我呢個香港島路痴去到九龍唔好又迷路!

衰野唔講啦, 講呢d!又講下食先!今次呢個餸本來係妹妹給的食譜, 我們3姊妹雖然住在3個唔同國家, 但我們差不多每日都會聯絡, 真係多得而家科技發達!大家遇到咩事都會好快報告比另外兩個知, 就例如發現一d好味既食譜, 都會share!(其實我的家人有時都會在這裡留言呢!) 。原食譜本來個底係polenta, 不過我買唔到, 就轉用鮮奶蒸蛋白, 一樣好味, 調味料的配搭我都稍作修改為合自己口味, 如果大家有興趣都可看看原食譜!

我的食譜 : 

a/鮮奶蒸蛋白:

蛋白 -  4隻
脫脂奶 -  3/4杯

做法：

1. 把蛋白輕輕打散再倒入鮮奶打勻。碟面鋪上一層保鮮紙，用牙簽吉幾個窿。

2. 滾水下鑊，用中火隔水蒸約10分鐘（到時執生, 因為大家碟同爐火唔同）。鑊蓋留下一條隙。

 b/洋蔥磨菇 : 

洋蔥 - 1個
磨菇 - 一盒
蒜蓉 - 1湯匙

1. 蒜頭切成蓉,洋蔥切細條, 磨菇切片
2. 先炒洋蔥變成金黃, 軟軟的仲未得架, 要炒到金黃d甜味先會出, 我大約炒了20分鐘。

 3.先加入蒜蓉再加入磨菇兜勻至磨菇軟身,加點鹽,糖,黑椒調味, 如果太乾可加一湯匙白酒。

4. 完成直接舖在蒸好的蛋白上, 食時灑一點碎香草攪惦, 食得!^^

 祝大家情人節快樂!!<3