開始包包生涯

我咪講過N咁多次我係唔中意食包餅既, 點解我又會整呢? 首先最大原因係因為我老公中意食, 佢變態到有一次自己一個人食晒成條生命麵包, 仲要係多士, 食到自己生晒飛滋...哈哈..

而點解我唔中意包呢, 因為我好怕食乾爭爭既食物, 我食一個包要用2大杯水去送, 脹爆肚!但有時兩個人一齊又要互相遷就既, 於是我就發掘食包既樂趣, 我發現原來甜包同埋有餡既包我係OK喎, 唔洗飲好多水, 於是我就向呢個方向去整啦!暫時整左兩次, 因為平日返工真係無咩時間去整。

我唔選擇用麵包機,亦無用機去打麵團,  原因係好似學車咁學左自動波唔代表真係識揸車, 一開始學難D既棍波, 打好底之後想懶先再用機器代替, 而且用手搓包都好好玩丫, 部機暫時放埋一邊先!

第一包:薄荷朱古力包
我唸, 我第一個包要係我最中意既口味, 薄荷朱古力一向係我最愛, 就用佢黎整包啦, 個食譜同出處我唔寫啦, 因為個包樣衰, 外硬不過內軟, 唔係我中意既野囉, 不過我覺得第一次係咁啦, 總要交學費!

第二包: 粟米包
呢個係老公點既, 因為佢中意食粟米,今次用左carol食譜, 100%跟足, 用手打麵團大約200下,效果好好!

剛整好型最後一次發酵中

本來老公無理我, 點知一見包包出爐, 好似傻左咁勁興奮狂影相...哈哈...d包好迫呀!哈..

睇睇個內部橫切面!

總括黎講, 係好食, 有好香奶味, 好鬆軟, 亦都唔乾, 我會繼續整既...哈哈..而我老公竟然一個人要左4個..果然係包精..哈