好味南瓜餐(加入南瓜西米露好食秘技)

好似好耐無post過煮野食..哈哈..其實近來唔係無煮野食既, 少咗d囉..真係好鬼懶!好在我老公不嬲都好縱我, 我中意做咩就做咩, 煮, 佢固然之開心, 我話唔煮佢又無咩所謂, 我拋夫棄貓地躝街佢又由得我...呵呵..

唔知大家仲記唔記得上次我去大自然素食,食咗個佢地送既南瓜西米露既!當我自己發嗡風話要老翻佢個糖水時, 比侍應姐姐聽到, 佢話咗個密技我知, 叫我加多樣嘢嚟吊味, 我跟佢整咗啦!呢樣秘密武器就係木瓜!事實上, 我先食未加木瓜既南瓜糊, 同有加既分別係, 加咗木瓜既係fresh d, 食落無咁"寡", 無咁"漏",得意在係完全食唔到木瓜味!

材料 :
1.南瓜
2.木瓜
3.西米
4.冰糖

我既南瓜同木瓜比例係咁既!木瓜係少d!

 西米滾水放入大滾1分鐘,合上蓋熄火焗20分鐘, 再放入凍水隔水備用。 

兩種瓜切粒粒, 連冰糖放入滾水。(我只有南瓜因為我要先試沒有木瓜的分別。)

 煮至冰糖溶掉就可用攪拌捧打至滑身, 西米回煲再滾起即可!

話明餐梗係除咗甜品之外仲有正餐啦, 但因為已經煲咗糖水, 我既煮飯能量剩返好少..哈哈...所以煮一d現成嘢算啦!

之前響阿信屋買既南瓜雜菜餅大派用場!幾好食,下次會再入貨!

 掃少許油放入焗爐焗至表面金黃即可!加埋菜飯食, 好好味呀!!

 老公小食有枝豆, 佢最愛!

做法:
枝豆洗淨放入大滾水加少少鹽合上蓋滾5分鐘, 熄火不要開煲蓋焗10分鐘, 盛起隔水攤凍食得。我老公就放埋入雪櫃雪凍食。我唔中意食豆都覺得幾好味^^