第一次 x 3

上星期的母親節例牌又係唔關我事啦!約埋妹妹一同打給媽媽, 來一個凌晨4人會議, 感覺好得意啦, 我在香港, 大妹在波士頓, 細妹在加拿大, 媽媽在紐約, 但都可以同一時間聯繫到, 好彩通訊夠發達!今年亦無特別預備母親節禮物, 反正過多幾個月見到面任佢自己選購仲好!

母親節當天落足一日雨, 夜晚仲紅雨tim!都無心機出街, 惟有投入廚房, 今次做咗3樣我第一次整既野食, 其實只係一d無咩難度既野, 但新鮮感真係令人好興奮呀!!

第一樣整既係muffin, 其實我不但係第一次整仲係第一次食, 其實我都唔知點解, 總之muffin永遠都唔係我首選, 硬係提唔起興趣食。咁我又唔知點解我突然好想整, 見屋企有齊料就試下整啦!我base on blogger kestrel 既原味muffin, 整咗我最愛既薑味玉桂提子乾鬆餅, 唔記得自己個爐下火勁, 平時焗咩都要響最後10分鐘熄下火, 今次個底就燶咗d啦!不過都好好食呢!我無用乳酪, 外脆內鬆,正正!

第二樣其實唔係咩新奇嘢, 只不過係什果沙律..哈哈...唔好噓我住, 唔係第一次整, 係第一次加埋海珊瑚入去。之前無諗過可加入什果沙律中, 因為直覺上係加入什菜沙律再加醋的,但上次響心齋食過, 一於做copy cat!

我的做法係用凍水浸開後(大約兩個鐘, 其間換過兩次水), 臨加入沙律時, 用熱水淥一淥, 直至佢開始有黏性就倒走d水, 加入沙律就ok!可能海珊瑚有凝固作用, 第二日食竟然無出水!以後都要加!

香港買d海珊瑚頗貴, 之前買係$40/兩,媽媽從美國買的大大包只係us$10咋!!

  發多咗第二日用嚟整南瓜糊!(又係包咗保鮮紙先影相!stupid!)

好啦, 最後一樣第一次係pizza啦!pizza包就整過, pizza又未喎!因為始終家中得兩個人, 隔夜又唔好食, 最恐怖唔係驚食唔晒, 係驚食得晒...哈哈..ok, 呢日就係啦!每人食4件, 肥怕唔怕呀!!!哈哈

  材料晒下冷先!

我中意無邊超薄批, 好好味呀!!餅底用咗高ling的薄批食譜, 一半用千島醬一半用茄醬, 兩樣都中意好味!^^

 

 唔中意整嘢食既人唔會明白點解有d人明明唔係有一家幾口響屋企等開飯都要全日響廚房翻滾, 我就係明明屋企得兩條友其實唔洗整咁多嘢食, 但係有時煮食帶出既滿足感唔同興趣既人係唔會明啦!