【改良版】肉桂卷

上星期日實在熱到超喪癲!我呢隻冷氣狗又係時候開始與冷氣做伴啦!最慘唔係曬唔係熱, 頂,你唔好真係連一滴風都無丫!焗到呢!

於是我上星期日完全無出過街, 連街都唔落。但一條友響屋企攤屍咩都唔做唔係辦法, 摷下屋企有咩物資整下包包。突然間諗起一樣嘢, 唔知大家有無食過ikea既肉桂卷, 係係係, 我知, 死爛甜, 就算佢唔係死爛甜, 佢又真係特別好味, 有時癮起都會去食, 食完又會買一包返黎焗..佢d肉桂係醬狀, 頂,明知死甜但每次都要食兩個, 所以成日都想試下自己整唔整到咁既效果。另外每次食卷包都會一路食個卷一路打開, 食得好鬼狼狽, 今次我唔係成個麵團咁卷, 係分開一舊舊卷,食落好方便呢!屋企有齊料, 惦晒!

今次仍然係用湯種, 材料大同小異啦!

湯種:
1. 熱奶50ml
2. 麥粉50g

主麵團 :

湯種100g

高筋粉230g

低筋粉20g
速酵3/4茶匙

蛋1隻

奶100ml

糖18g
牛油30g

鹽1/4茶匙

肉桂醬:

肉桂粉, 蜜糖,水,提子乾

我估醬中係有牛油, 唔落可能會唔成功,但我真係唔願意落。份量我好隨意, 總之變做醬狀就ok。

手排氣後分10份,休息15分鐘先

整做欖型(但唔似==")

"Look"成長方形, 我的是扭腰長方形, hehe..

塗上肉桂醬和提子

卷好收邊

中間切半但不要切斷再攤開, 攪惦!

發酵多1個鐘先

180度,18分鐘, 可以好似孖條咁分開一人一半咁食, 食得無咁論盡,如果d醬加埋牛油肯定好好味,但自己響屋企整得又唔洗咁盡既..hehe

大家睇開我個blog都知我住邊頭啦, 年年端午節晨咁早就開始扒龍舟, 好多朋友都覺得好正, 頂其實我呢d訓到3點不露既人真係勁惡頂, 嘈到無覺好訓, 唔知係咪真係一年比一年大聲, 比人投訴, 今年個主持終於唔用咆哮既聲線大叫, 我自然醒左終於有d興趣響屋企嘆住冷氣望落街睇下龍舟!哈哈...

 龍舟響岸邊等待中

嘩開始啦!岸邊勁多人!

近d睇下,嘩, 大家用盡全身氣力咁, 好熱呀!!