我媽的竹蔗水

個標題好似粗口咁...哈..因為我覺得呢d家喻戶曉既湯水, 每一個阿媽都識, 但未必個個阿媽都一樣, 總會有自己嗰套, 而家夏天啱晒飲, 所以我就分享一下我媽嗰一套啦!

材料中有芫茜, 我個人係勁憎芫茜味, 所以阿媽煲時, 整間屋都係芫茜味即刻勁抗拒, 點知阿媽勁不肖地說我地由細到大都有飲, 只係我地唔知ja!當佢煲左一個鐘開始就聞唔到芫茜味啦, 再煲多一個鐘飲時, 真係飲唔到芫茜味喎!唔怪得細個飲左都唔知啦!

阿媽話芫茜好鬼有益, 多飲無妨, 話我地細個出疹都要飲佢解毒, 又清熱呀咁, 其實佢仲講左好多好處, 做仔女既聽到阿媽要講耶穌例牌逃之夭夭啦..哈..總之你話咪飲囉,飲囉!哈..

材料:(我用9公升煲, 兩條友飲3日)

1. 竹蔗 - 3支
(唔好買一扎扎嗰d, 買樣衰污穢嗰種!)
2. 新鮮茅根 - 1扎
(我試過買藥房乾茅根, 頂, 碎嬸嬸, 浮起晒攬到成煲野好似好多木碎咁!我覺得如果買唔到新鮮直頭唔好落!)
3. 甘荀 - 3支
4. 粟米 - 1支
5. 馬碲 - 1斤
6. 芫茜 - 2大扎
7. 糖冬瓜- 隨喜好

竹蔗叫菜檔飛頭尾(因為插在地上污穢), 斬短(順手睇下個心有無紅色, 係爛架!), 返屋企用百潔布擦乾淨,洗前洗後爭好遠架! 

再十字破開, 睇手呀!

馬碲比錢菜檔批埋, 佢問我會唔會偷食, 如果偷就比多10粒我..傻仔,梗係偷啦, 仲問..嘻...返黎沖沖佢。

 

所有材料洗好, 凍水放入,滾後細火兩個鐘,同我一樣怕芫茜味既請放心, 佢最多掙扎一個鐘之後就慢慢無味架啦!

飲後感: 嘩頂, 雪凍仲正, 無芫茜味, 比唔落芫茜飲落好似濃d,正!