假日無油蒸蛋白蛋糕

點解要咁強調係假日蛋糕呢?因為響毫無壓力時間充足咁整嘢食, 心情特別暢快, 成功率都高好多!

之前都整過好多次蒸蛋白蛋糕, 其實都唔成功, 全部下陷!但經過我早前瘋狂整戚風蛋糕之後, 對於發打蛋白呢個動作已經做得頗穩定。見放假破天荒晨咁早就醒咗, 突然癮起想食蒸蛋白蛋糕, 整囉整囉!佢同焗戚風唔同既係一滴油都唔洗落, 食譜中蛋白霜既糖減無可減, 因為太少糖發得唔靚架!而我都仲係整得幾樣衰既, 但有經驗下次可以好樣d, 我會寫埋比大家睇有咩要改善呢!

份量 : (7吋模)

蛋白霜:
蛋白- 4隻
糖 - 40-45g

麵糊 :
低筋麵粉 - 80g
糖 - 4g
奶 - 100ml

先將蛋白放冰箱雪6分鐘, 條邊會有少少結冰

期間麵糊攪成咁既狀態, 粉要過篩

蛋白打成中性偏乾, 如果係戚風蛋糕打成咁已經變到唔鬆軟, 但今次係蒸既關係所以唔洗驚, 反而打得唔夠會有下陷危機!將1/3蛋白霜倒入麵糊拌勻後全部倒入蛋白霜cut & fold拌勻, 不要太粗暴會消泡。

倒入7'模,鄧出空氣, 凍水放入鑊, 用筷子攝住留條隙, 水滾後轉細火蒸16分鐘(改善 : 要加保鮮紙, 可以均勻d, 靚d)

唔會好似焗蛋糕咁昇高, 完成後不要即刻拎出黎, 將條隙再開大點, 待5分鐘先拎出。睇下個切面就知好濕潤細密!

(改善 : 我見到嘢食都會忍無可忍, 今次都唔例外, 出鑊即起模即切即食..哈哈, 其實放到佢凍d先切個樣會靚仔d, 挺d)

幾樣衰!不過太太太好食, 一條友一次過食咗1/4個!!!好smooth好,好香蛋白味,自己邊食邊尖叫!哈哈哈

我難得地勁滋陰, 灑上我最愛我肉桂粉加埋d nuts, 好味到想食晒成個!呢個蛋糕我係第一次好浮誇咁訓身hard sell, 好味到爆唔在講, 而且製作材料都好簡單,又無油無蛋黃, 老人家都食得啦!食剩雪凍咗仲好味!!(果然好hard sell...hehe)