4月爸媽回港大雜記

浮面啦!浮面啦!已有三個幾星期未有update我的blog了!可能係我屎上最久的一次呢!連電腦都無開過, 因為我的爸媽回港小住, 今次住3個幾星期。身為孝順女的我(嘔死人!), 當然要侍候左右, 所有私務暫時都要放埋一邊!爸媽帶來大量手信及必須品, 但重點我要post出黎係妹妹送給我最愛x100既vin diesel 物品!愛死佢!!

有大廚在家, 呢段日子, 我的廚房不是我的, 我呢個小薯仔邊有資格埋爐頭, 只好做一D下欄嘢, 裝下飯, 開下枱咁, 其他日子都係擘脾等開餐..haha..大廚即是大廚, 媽媽每次煮的份量都足夠一圍枱食, 但最可怕是我們4個人, 每次都吃清光! 我習慣每日都磅重, 呢排成日逃避上磅, 每次都戰戰兢兢..haha..容許我只有少量媽媽煮的餸的相, 因為每次餸一放上枱就變成餓鬼投胎咁清晒呢!

5/4清明節- 爸媽幫我補祝生日, 名為"Mc Mary 清明生日party"..哈哈..請來最close幾個老表一齊來大食會。煮的部份由媽負責, 要比錢的部份由老豆攪惦..哈..當然還有我終極成功的紅茶戚風呢!有d相因為掛住食嘢已唔記得影, 但真係飽到難以置信咁飽, 係呢十幾年來最開心既生日派對!(老公會唔開心呢..hehe)

11/4我本來plan咗去大嶼山大佛, 因為我以為佢地好想去, 我已作好行行行既準備, 點知原來爸媽興趣不大, 媽提議說去赤柱行行, 因為我住南區關係, 去赤柱好近啦, 媽經常聽我說和老公行赤柱, 一直都想去, 原來佢住咗香港咁多年都未去過呢!又係開心愉快的一天, 4條友, 食食食, 行行行, 買買買, 滿載而歸, 超滿足。

 13/4南丫島一天遊, 呢個trip係我同表弟響一次隨口吹水話比佢知我發現屋企樓下有隻船直接去南丫島而訂既, 於是大家就相約我爸媽回港後兩家人一同去行行玩玩。

而個結局係變成一個大家族出征, 點解叫出征?因為我覺得除咗我表弟外, 無人知道原來呢個trip主要係行山, 嘩頂, 家族中有老有嫩有帶埋bb車的,本來表弟plan咗行去睇風車, 嘩條斜路斜到呢, 對老嫩都太危險, 改為無咁危險但苦過苦行僧既榕樹灣行到索罟灣, 成世未試過烈日次下行山, 頂我以為南丫島係好似去大嶼山長洲咁行行買買!不過係一個好好既經驗呢!不過一大班人, 邊行邊講下笑, 都係好開心的一天!

每家都要帶一點小食去share, 我整了包包呢!大家都好捧場^^

 

 當日晨早極大霧!!

 到了!

經過南丫島動物保護中心

表妹的兒子, 靚靚仔仔, 見到斜路含住個蛋糕都要奪命狂奔,笑爆咀..哈

回程索罟灣碼頭, 亮點係退潮露出的青苔電單車

14/4家族第二天再次聚會, party, 去了麥當勞道"心齋", 有一層全部都係獨立房間, 幾嘈都得, 裝修幾靚, 服務好好, 食物唔係唔係扮牛扮肉嗰種, 清清地都幾好味, 不過唔夠大碟呢!

 

18/4陪媽媽去取妹妹結婚那日她著的晚裝裙, 嘩嚇得我, 著上晚裝的媽媽, 令我傻了眼, 趁佢試穿時嗱嗱聲影張相拎出去在外面等候的爸爸看, 見佢只懂張大口..哈哈..再send晒比妹妹他們, 全部嘩嘩聲, 頂, 我真係要搵條勁d既晚裝, 唔可以比下去, 哈哈..跟住住去中環展城館睇展覽, 去到先發覺原來佢地旨意我帶路, 喂!我係全球知名道甚高既路痴!!最後用埋google map都係行咗好多寃枉路, 最後放棄去咗麥當奴飲咖啡..哈哈再去銅鑼灣買到變咗駱駝再回家..哈

21/4到了他們回美的日子了, 這段日子過得好充實, 我諗呢排行既路比我一年行既路還要多。回想爸媽回港的日子, 平時習慣自由自在的我們, 生活都變得有了規律; 平時自生自滅的我們, 都變成被受盡呵護照顧, 講真, 起初真係有點不慣, 但其實, 要習慣有人闖進自己的生活, 係可以好快地適應的, 但相反原來要習慣家中少了兩個人, 係一件好不容易的事, 雖則我知道, 過多幾個月我們一家又會在加拿大聚首一堂, OK, 我承認我軟弱的靈魂再次把我堅強的靈魂打敗, 我再次由機場喊到出市區, 頂!

每一次爸媽回去後, 我都會充滿遺憾的, 每次都覺得自己好仆街, 覺得陪他們的時間不夠多, 覺得做得好不足, 覺得自己因為懶同埋怕social而經常拒絕他們外出係仆街中既仆街!但今次我沒有遺憾了, 因為我最怕的我今次全都做盡了, 山行過, soical 又so 過, 烈日當空郊遊,最唔中意去的旺角,3星期看了3套戲...咩我都做到了,  總之佢地話去邊就去邊, 對得住自己對得住父母好爽歪歪呢!

爸媽, 9月見!(出賣父母背影..hehe)