1皮3味 之 第1味 - 餃子

之前講到, 無lala放咗10日假期, 初初幾日唔知自己會放咁耐, 覺得勁灰, 一來因為有d公事做做下停咗, 二來覺得好死悶><

咁死無聊, 要打發時間梗係整嘢食!成日有d嘢好想整嚟食, 但返工嘅日子又唔會整, 因為返到屋企都成7:00, 唔係好想太夜食飯, 所以weekday都係整簡單嘢啦!

咁其中一樣好想食嘅係餃子, 但都的唔起心肝, 一嚟又無時間, 二嚟因為懶, 咁放咁死耐假唔整仲等幾時呢!

本來唸住自己搓餃子皮, 妖發覺屋企又無粉,唉算吧啦, 落街買算喇!咁去到舖頭, 因為太耐無買, 唔記得份量, 只好同阿姐講要大約50塊, 咁佢話即係一斤啦, 頂我好豬兜無用腦直接話好, 懵盛盛就買咗一斤皮返屋企啦, 咁整開嘢食嘅你地都知, 我係買多咗一倍份量啦...hahah

因為餡料一早已經預備好晒無得再多, 所以最後就用餃子皮分開兩日整咗3樣嘢食喇!咁第一樣當然係整餃子啦!

今次嘅料有 : 
白菜 - 1斤
炒蛋 - 2隻
素火腿 - 4片(攪碎)
菜圃 - 3包仔
粉絲 - 1扎

調味就用咗 :蔬菜粉,麻油, 糖, 豉油, 燕麥糠

攪勻晒就佈定局開皮!

對眼掛住睇電視, 包得有d hea, 所以有d爆口, 突登將爆口嗰d group埋響另一碟用嚟煎, 包得好樣嘅就用嚟滾

冰佢15分鐘就嚟料喇! hmmm...今次整得幾好食!最中意整大大隻一啖一隻塞爆個口!

但有得揀, 我中意食煎多d!煎得有d樣衰, 但堅脆!

下一篇就話埋比大家知我點樣KO剩返嘅皮!