自家南瓜子脆糖

對於整糖, 我既結論係脆糖最容易整。只要煲夠溫度撈埋一齊就攪惦!又唔洗獨立包裝, 切完就食得, 快靚正!而且一搬都係用炒香左既乾果, 食落勁香!

好似賣緊廣告咁...哈哈..因為我就係要介紹南瓜子脆糖。因為爸媽都中意食瓜子, 咁岩又係新年, 岩晒啦!但唔好expect同我地平時新年食既瓜子一樣味, 因為果d係用醬油煮過呢!我今次做的糖,會將部份的砂糖改為天然海藻糖,海藻糖係屬低甜的糖, 但唔可以獨立用, 會好淡,勁寡!最多用一半, 所以如果你唔想用海藻糖就將份量加在一起全用砂糖就ok la!大家都試下整自家新年糖果, 好好玩架!

材料 : 
a/
白砂糖 - 62g
海藻糖 - 62g
水麥芽 - 75g
水 -75g
鹽 - 2g

b/
南瓜子 - 650g
炒熟了的白芝麻 - 35g

c/
牛油 - 5g 

 

我較中意用煲直接量糖, 唔洗倒來倒去!記得不要用易潔煲呀!

 

所有野量好晒就開爐啦喂 !

1. 南瓜子用中火白鑊炒香,和熟芝麻兜勻放入焗爐用上下100度保持溫度。

2. 煮糖, 把a/材料煮至142度,夠溫度熄火, 放入牛油。

3. 直接把暖暖的瓜子芝麻倒入糖煲快手兜勻!(無可能影到相吧!哈..)

4. 預備一個不秀鋼長方形兜放上不沾布, 把撈勻了的糖倒入, 所有動作要快手!
5. 繼續要手快, 把另一塊不沾布蓋上面壓實

 6. 趁微暖切成方塊, 凍左先切就太硬了!

後面有座山..哈哈

注意 :

1.不要用易潔煲和膠鑊鏟, 我是用大木羹的。

2. 乾果要保持熱度才倒入糖煲是必須的, 因為涼了的乾果遇上熱糖, 會把熱糖快速冷卻變硬, 就唔可以撈勻啦。如果無焗爐可放入電飯煲保溫。(我沒有試過, 是剛想到的,唔..我真聰明..哈)

3. 溫度由100度去到125度都是行得慢慢的, 但一到了大約130度開始會昇得勁快, 小心一個唔小心煲燶糖!

4. 書說食用期為3個月, 我只會留2個月保險d, 而實際上係2日內已KO晒...哈哈哈