悠閒好天氣

walala,呢幾日心情太好了!我嘅心情一向好取決於熱唔熱，因為我係火人，基本上就算大家覺得唔熱我都係熱嘅，所以，呢幾個月我已經扯火好耐..hahaha

星期五，同同事都無咩嘢做，重要係乾燥又涼爽，即刻搭車去食一間成日都想去嘅小店食burger,我哋都係食沙巴龍躉漢堡，同埋share炸蕃薯條，即叫即整，好飽好滿足啊！

星期六天氣都唔算熱，於是一條友搭車去行下附近mall，唸住買下屋企嘢。雖然同老公行街都開心又有人拎嘢，但一個人行街都有一個人嘅樂趣。最後商場有d 有機蔬菜檔，只係開一星期嗰 d,買咗堆有機蔬菜，好很重，開始覺得熱😑😑,惟有返屋企😑😑

咁即刻煲咗個粟米+鬚+粟米皮+馬碲煲一粒鍾。今次第一次加埋粟米皮，好香啊！老公話飲完d關節輕鬆咗喎!

好勤力呀我!夜晚繼續整埋堆有機菜，簡單整個蕃茄蛋，蒜蓉烤茄子，加埋牛油焗雜菇，好正正!

呢個蒜蓉焗茄子第一次整。好惹味!

切開茄子180℃焗10分鐘，拎出嚟界幾刀，塗上蒜蓉醬❨蒜蓉+糖+少少蠔油，水，麻油❩焗15分鐘熄爐焗多5分鐘。下次我會試日式麵豉醬!

星期日，見仲有個老黃瓜剩，唸起細個時阿媽成日煲比我哋飲，用老黃瓜，甘荀，粟米，鬚，皮， 扁豆，赤小豆，生薏米，煲兩個鐘，可以去濕去水腫。你可以加蜜棗加少少鹽。

點解我哋細個咁中意飲？因為我媽唔係落蜜棗鹽，係落片糖甜甜哋等我哋飲多d.我而家都係落片糖飲，d 味好夾，非常好好好飲!

返屋企時路過花檔，見到粉紅色滿天星好靚，我知係染色，但真係好靚，雖則我性格麻甩，但我好中意屋企有花令間屋有d 色彩睇到會好開心，反正搵到個位dingding去唔到。於是買埋桔梗 牡丹,第二日起身見d花開得好靚，呢個weekend心情同樣好靚!walala..