菠蘿蕃茄撞墨魚

上一篇講開我爸媽中咗「祖父母症候群」,你話家人之間有無妒忌心, 人哋我唔知, 我地屋企又無喎, 如果我地3條女真係有妒忌心, 我唸我爸媽都唔會事無忌憚做得咁出面, 而變成一個又一個笑話!

前幾日我老豆同我講我大妹個仔'好似'有d發燒,話佢自己好擔心, 我話細路仔發燒好小事啦, 係人都試過啦, 戲肉嚟喇, 佢話人人都病得, 佢唔得, 我話點解, 佢話「因為佢太得意」...
妖!!食屎啦,!!!xxa*!@u@%y#xyxy£*
我話我夠得意,我又要返工!?!?!
跟住我將呢個對話極速笑爆share比我兩個妹，大家一路將「我咁得意，但我卻xxxx」loop落去，笑到我地吖！

有單又係勁好笑, 話說有一次我地一家坐7人車, 咁我同細妹坐最後, 咁落車時我老豆坐前面推低個seat位比我地落,咁我行先, 我老豆伸手出嚟, 我心唸無嘢呀,唔係咁膠想扮扶我呀...點知佢一手將我扯咗落嚟, 咁地下又係冰, 我一嘢比佢扯到跣咗去大西洋, 好在我馬步穩JA!!!正想擰轉頭剷佢上天花板, 聽到佢好嘔心用溫柔聲線「小心D呀」, 嘩打晒冷震, 不過見佢知衰放過佢啦, 點知我擰過去見到佢參扶緊細妹公主落車, 句嘔心溫柔「小心D呀」係同佢講嘅!我即刻同佢講，如果你唔係老人，我一定會一腳伸你去大西洋，但呢單嘢變咗做笑話講咗好耐...hahaha

但有收入就必定有付出，細妹付出嘅嘢我哋係付出唔到。因為我同大妹都係比較強捍嘅人，對於d太sweet sweet嘅嘢只會覺得倒胃，當我媽叫kiss her goodbye,拖手呀，我哋兩個都會叫佢食屎，但細妹呢就真係會做喎，響嗰一刻我好多謝我係被扯出大西洋嘅人而唔係被扶嗰個!!hahahhaha....兄弟，呢杯你頂喇!

所以話做人咁認真有鬼用咩，嗰d成世jealous自己兄弟姊妹嗰d, 你話呢d人損失咗幾多笑話，失去咗幾多笑爆咀嘅機會呢！

好喇躡一聲又轉話題喇，當然講食啦！早幾日瞓唔著上網睇嘢，嘩頂半夜係唔應該睇嘢食，見到咕嚕肉先發覺好似忘記咗呢樣嘢!第二日放工去買料整喇，咁我就唔係整豬肉，我整墨魚肉，一樣咁正，同埋我想整有汁，好餸飯嘛！所以總括嚟講呢個唔屬於咕嚕嘅..hahah

材料就係咁簡單： 
煎香嘅墨魚滑，青椒，蕃茄，洋蔥，罐頭菠蘿，菠蘿汁

我又唔中意新鮮菠蘿，罐頭呢就會用呢隻用菠蘿汁浸用嘅，糖份比用糖水浸嗰隻少超過一半

整就好easy,按次序洋蔥→青椒→蕃茄→菠蘿→墨魚滑兜勻，重點係汁，我用茄汁(最多),菠蘿汁，柚子醬油，喼汁，糖，少少蠔油，水。連汁兜勻煮5分鐘，太稀就埋獻(我無),食得!!