蕃茄海鮮濃湯

我不嬲都認我係仆街嚟嘅, 因為我從來都唔會理我老公要求任何嘢, 唔會話佢想食咩就一定整, 所有嘢都係depends on老娘我本身想唔想做...hahhaha...總之我有興趣整就整唔好咁多嗲!hahaha..

之前講過, 我老公年頭入完醫院個胃reset過咁, 開胃晒, 同埋食嘢個樣好似好開心咁, 攪到了起我(整嘢食)把火!hahhaha...
而家就不得了喇, 唔好話佢要唔要求, 我而家直頭變咗地球咁, 圍住佢呢個太陽嚟轉, 原來條蛋散只係食得個衰樣好鬼滿足, 就已經令我乖乖咁不停自動波整整整, 我而家霸氣盡失了!明明出晒名懶嘅我, 變到(我覺得)好勤力啊!

我連早餐三文治都有整過, (我覺得)我好勤力啊!

P.S.好似好厚, 吹佢唔脹又食得晒喎!

如果無湯飲嘅日子, 我會打生果囉!(我覺得)我好勤力啊!

P.S. 呢個香蕉奇異果組合for去廁所好duck!

當然仲有d間場小食啦!(我覺得)我好勤力啊!P.S.呢個係拍青瓜+貓耳仔

但有樣令我好不滿嘅, 就係只要嗰餐有滾湯, 甚至係滾菜水, 即係菜+水+鹽嗰d, 佢都會用嚟撈飯囉!!!

響我嘅認知, 只有嗰餐d餸唔啱口味先會做呢個動作囉!!

我媽煮嘢好好味,所以我由細到大都未做過呢個動作囉!!

okok, 即係侮辱我煮嘅嘢唔好食ja!你要撈我就比你撈, 不過唔好響我面前撈菜水, 要撈就撈好嘢!(頭上正在散發光芒!👼)hahah...

咁佢就好中意食蕃茄嘅, 咁就煲蕃茄海鮮湯...飯!

哇...我未見過咁大嘅蕃茄!!

蔬菜料係咁簡單, 蕃茄3個巨型, 洋蔥1個, 甘荀西芹少少吊味得喇!

先爆洋蔥最後蕃茄遂樣加, d蕃茄一邊兜一邊盡量隊爛佢!

跟住加水煲, 唔好一開始咁多水, 我只係過面多少少

, 可以加茄膏, 無所謂嘅, (我嗰隻成份只係99%蕃茄,1%鹽)

我就加咗1湯匙, (因為我剛剛用到最尾...haha..不過都夠喇!)

加塊月桂葉細火煲30分鐘, 就可以加海鮮, 我就用咗魷魚, 蝦(搣走咗殼, 因為我怕敏感, 其實有殼會香甜好多!),蜆, 鱈魚

跟手加埋白酒, 我中意用呢隻, 因為有果香味,又平!用嚟煮飯啱晒!

調味, 除咗鹽糖胡椒基本嘢,蕃茄湯我會用咖哩粉調味, 唔洗多, 我呢度用咗2茶匙, 唔講唔會食得出, 但成個味會濃d,!!另外仲加咗1茶匙紅辣椒粉(唔辣嘅其實)(可唔加)。邊試邊加。熄火焗幾分鐘等d海鮮熟, 食得!!

好濃唔洗講!加埋海鮮嘅甜, 好正!!!!

一post一花 :

其實我不嬲都唔中意玫瑰囉, 但嗰日最新鮮係佢, 見到d黃星好大粒又買, 仲有d好似鼠尾草咁(唔知咩名)又買, 返去一插, 好震驚呀!好很娘呀!!!娘到可以拎去回歸晚會向住佢唱黃河滔滔流(唔知咩嚟, 亂作歌名...haha)嗰種feel啊!!!!

第2日起身, 見到仍然唔開胃, 即刻將3樣野分家, 哇好好多喎!!!

嗱分開係無問題, 我終於明白好似有d人, 明明眼耳鼻都靚, 但加埋一齊個樣唔靚係點解喇!!又好似有d人, 係靚嘅, 但總會有浸鄉土味咁!!hahaha...