粉絲炆茄子釀豆卜

本尊開始閉關了。

太熱喇痴線, 香港嘅熱真係唔係人咁品!

有日聽收音機, 有個演員話佢得天獨厚, 就算熱到水浸, 佢塊面都係唔會點出汗嗰種!嘩好羨慕!

我深信如果要將人體汗線layout出嚟, 我塊面會好似油尖旺地圖咁囉!!!明明未去到熱到爆但我個頭同塊面已經爆汗!重災係人中位同埋眼肚位, 嘩就算化到個妝靚靚一出汗個死樣都「哩啡」晒! 再加埋唔知大家記唔記得我之前講過, 我d頭髮只要惦到水就會「篷」一聲鬆起晒變咗爆炸狗!「哩啡」死樣加爆炸頭,仆乖吖靚到吖!!hahaha....所以呢真係無咩必要唔出街喇, 冬天先出關喇!hahah...

前post咪話有日買餸,去咗檔臨時有機檔買咗d瓜菜嘅, 其實有無機又唔係最重要我無所謂最多洗耐d, 重點係d瓜d味好濃好好味啊!於是我隔咗幾日又去多次睇下個菜檔仲有無響度, 原來仲有兩日就擺完又要等下一round唔知幾多個月後, 同個檔主講開原來佢係響粉嶺農場嘅農夫, 最開開開心係, 原來佢地會做農場直送, 啱晒我啊!!

就係咁我今個星期就order咗一d瓜菜喇!佢嗰朝收割磅比我睇先再話我知幾錢, 好中意咁, 好公平貿易, 唔洗比d商家賺晒但農夫得少少咁!嗱我無收人錢唔係賣廣告, 我係真心咁唸架!

好喇, 第一樣整嘅就係茄子同埋蕃茄。茄子就係其中一樣我覺得一定要再encore, 因為真係好濃味啊!

心形啊!

簡單煎煎佢, 因為用油煎煎d蕃茄就可以將d茄紅素提升到人體吸收得容易d嘅水平(大約好似係咁是鬼但啦!)跟手淋d日式麻醬落去攪惦!

好喇,  攪茄子!我中意將d茄子煎一煎, 中意有浸煎過嘅香味!
但因為茄子好吸油,煎完我又會過一過滾水去咁d油。

豆卜煎釀魚肉easy job la,備用。

其實材料唔多, 預備好茄子同豆卜, 粉絲用熱水浸開, 用d糖同生抽撈撈佢, 配料都係薑蔥蒜嗰幾條蛋散, 汁呢我就用豆辨醬,蠔油,糖,豉油,味淋, 蔬菜粉,水整嘅。

炆嘢最方便, 爆好薑蔥蒜,倒料兜均倒埋汁,細火冚蓋去睇電視, 收汁食得!hahahha....
好正呀d粉絲!!茄子同預期一樣咁濃味!掛住食粉絲食剩飯啊!

一post一花 :
今個星期插向日葵, 本來個老闆娘推介另一種花, 但因為我之前嗰晚發夢比向日葵怪施襲, 好似異形咁成朵向日葵包住我塊面死唔放, 所以我好想買向日葵...hahhaha...其實我唸d嘢無咩邏輯不用深究!hhahaha..