苦尋味道

我好怕有疑問響心裡面, 通常都過唔到夜!我一定一定會去搵答案!!

但我竟然比一個疑問存在好幾年!!可能好多人覺得我極度無聊, 我認!我就係果種正事hea爆, 無聊事就認真既人, 無得救..haha

我覺我成世人都係為左食嘢而生存咁!細個成日因為偷食比阿媽打, 又為左搶我妹d嘢食打我個妹(hahaha..), 為左食講大話, 大個為左食攪到肥都要食..hahah..為左食一檔好味魚蛋, 突登由屯門搭車出旺角, 食完又返返又屯門....數之不盡, 總之成日都係為左食失去理性。

好喇, 今次又係食!話說我有一日唔知做咩, 當我食緊麥皮時, 突然唸起細個食過一隻非常非常好味既麥皮, 而家一定無出, 但我真係好想好想知佢係咩牌子, 可能佢既而家既產品仲有少少佢遺下既味道?

我用盡我既方法去搵左幾年, 我阿媽完全知我講邊隻, 但佢都唔知係咩牌子!我亦訪問左同我同年紀既人, 大家都大概知我講咩, 亦都唔知係咩牌子>.<, 呢種感覺勁煎熬人!

唔知會唔會有人知我講咩呢?唔知你地有無都食過呢??下面係我知既嘢 :

- 當時我係初小學生, 80年代既食品

- 鐵罐裝, 唔大罐, 個罐面有一家人食緊麥皮(如上圖), 唔係真人, 係好似火柴人咁, 用簡單線條畫出黎, 即好似個頭就咁用圓形, 個身用三角形咁。個罐底色係啡橙色。

- d麥皮唔似而家既麥皮, 係好碎好碎既, 碎到好似粉咁, 深啡色, 比而家既燕麥糠粗少少, 味道介乎好立克, 阿華田嗰類。

- (唔知係咪真)我阿媽話當年買嘢比我地食既準則係睇電視廣告,所以應該係大牌子(我估), 但我而搵盡80年代既電視廣告都唔見!

- 雖然有一刻我都以為我自己有幻覺, 又或者當年去左異度空間食麥皮(hahahhaha...), 因為唔明點解好似得我一個食過咁,響網上又消失得咁徹底, 不過繼我媽, 我表姐, 我一個朋友都記我後 我相信當年都有好多人食過。

- 食既方法係加練奶同熱水, 但唔會好似而家d麥皮咁杰實晒!亦都唔漿口, 好香麥味, 食唔厭...hahha

- (唔知係咪真)我阿媽話唔係麥皮,係栗米片碎, 當年最hit係家樂氏, 我已經上佢地網頁睇晒佢歷年既產品都唔見!我亦有睇過阿華田好立克網頁, 都無發現>.<

希望大家如果知我講咩而你又知道d咩都可以話比我知..謝謝謝謝謝謝謝謝謝謝謝謝謝!!!

更新:

我媽同我一齊癲..hahhaha..佢睇左個post, 佢話佢既印象係個罐面係堅火柴人!係有腳, 唔係食緊嘢, 我唔知我定佢有幻覺, 佢仲send埋圖比我...hahha...做ref都好, 可能真係我錯....