去美國發癲 - 入門篇

我返嚟喇!我返嚟喇!我返嚟喇!

我終於返嚟香港,結束21天美國發癲生活! 同回歸正常生活喇!

今次好似失蹤咁, 講真, 呢21日, 我連電腦都無開到..haha

好喇, 咁我呢21日點癲發呢, 等我略略向大家報告一下啦(嗱..略略都好死長架吓)

大家都知道, 每年新年我都會整一次糖比家人,如果有人返就比人帶,如果無就寄。咁今次因為會兜口兜面見到兼差唔多齊人, 梗係有咁大鑊整咁鑊, 足足做左4 round!!癲架!

咁我唔會冷落我老公既, 一人獨享一樽(最後佢係食到生晒飛滋..hehe)

好喇,講入門梗係由上機講起啦!今次坐直航, 唔洗轉機爽好多!可惜, 我遲左少少上網攞位, 就係咁, 我坐左最後最後最尾最尾既尾三果行, 當然如果我唔介意隔離位有人坐其實我可以去返前D近機翼果part既!
經歷完好難食到極點既飛機餐,比好多病重(因為不停喪咳喪咳痰喪呻鼻涕)既強國人重重包圍,廁所比平時飛機廁所再恐怖100倍(不長盡,太可怕)既16小時之後, 仲要比一個目露死凶光既海關人員重盤問, 連"點解探親要探21日"都問得出!雖則我知呢d位不應硬碰, 但死港女係相由心生, 不其然反佢眼白, 加唔小心dup左下地, 瞪大雙眼講左句"AND CRAZY SHOPPING!!!"佢突然二話不說dup印比我走...hahahhaha...okok, 其實唸返起抹一把汗, 因為佢可以叫我原機收皮..hahaha...太衝動!

首先講, 我呢隻冷氣狗有無凍死呢?我要講既係, 雖則我係一隻冷氣狗, 但我有一個弱點, 就係我條頸(氣管)!就算我響冰天雪地只著泳衣都好, 只要我包好條頸, 都唔會凍親。咁我一落機係夜晚, 妹話下午先停雪, 雖然周圍雪, 但我又真係唔覺得凍喎, 就無突登圍返條頸, 咁就癩晒野喇!根據經驗如果我冷親係唔會打乞痴或者流鼻涕既, 而係會嘔!好喇, 就係咁, 當第2朝同家人食食下早餐已經想噴!忍無可忍要好浪費咁取消晒所有行程, 一返到屋企即刻嘔到仆街, 之後啪左d藥之後足足訓左24小時!!!ok, 24小時後當然精神百倍一條好漢, 正式開始發癲!圖為屋企後欄。

第2日圍好條頸就躝街!唔算好大雪, 亦都唔係太凍, 本來想行去買咖啡, 但有我老豆響度既地方, 就算行5分鐘佢都唔會比我地對腳落地, 即使我覺得行路係比揸車快。ok, 讚下你型啦下!

而呢位老兄係一個時間觀念好嚴謹既人, 佢9點幾訓!5,6點起身!你約佢9:00, 但佢最少8:30就到, 如果佢9:00先到佢會好憎自己!!hahhaa...所以好多時當你訓到好濃好濃時, 會聽到樓下有人叫到 :
"幾時出門口呀?"
點解佢會覺得我聽到?乜我有約人咩 ... "去..邊..呀..?"
"飲咖啡呀!"
睇下個鐘,嘩8點幾咋喎大佬!渡假我想自然醒呀!但我知如果我唔比個時間佢佢會一路響樓梯口唔郁既!"1個鐘丫!!"
"嘩!做少樣野得唔得呀!!"
妖,畫少條眉咩!哎, 就下你..."9個字啦!"
樓下仍然係嘩嘩聲, 但我唔想理佢喇!!
好喇極速沖涼洗頭化妝換衫, 其間會聽到老兄報時 : 仲有10分鐘!嘩跟住仆街咁衝落條頗直既樓梯!時間先係剛剛好咋陰公!好軍訓feel呀將軍!

而我老豆最中意就係咖啡+bagel

之後都頗大雪, 見到個窗嚇得我丫!死開啦, 我有密集恐懼架!!!!

大雪到丫!本來唸住出動, 但我個穩陣派老豆覺得能見度太底, 水潑又結晒冰, 決定打道回府..妖...

晏少少天氣好dd, 出去買多件再勁d既羽絨, 冷氣狗竟然淪落如此...

好死早就天黑, 悶死人, 自己響後園玩雪。腳是我的, 但老土拖鞋係阿媽既!..hehe

要唸下計, 唔可以日日都咁早收皮!要搵d野消磨時間先得, 第2晚就唯有上房攬住有我老公陣除既公仔聽下收音機先啦!hehe..

大家有無都比我悶親?第2日jar!將就下!我會好快繼續報告埋發癲之旅!事實係之後亦都會充實好多!!