極簡單芝士粟米餅

例牌講煮嘢前先講下自己嘢, 唔知大家睇完仲有無胃口睇煮嘢食呢?hehe...

前幾日仆街, 我相信係全世界最嘔心既仆街囉!

話說, 通常我地開飯就係全體響同一時間開皮既, 即係人貓都係同一時間開餐。咁響我地只係食左幾啖既情形下, 聽到同睇到最唔想發生既事!!!好明顯dingding一見罐罐就狗衝!!

(狗衝from internet..haha)

食得咁趕咁下場咪就係嘔囉!!!我相信好多貓奴對主子嘔呢家嘢都見怪不怪啦!但問題係我自己都狗衝食飯中!!!hahah..大家應該理解響呢一刻唔會想去處理嘔嘢啦吓!好喇, 等食完飯先攪啦!就係咁食完餐安樂茶飯, 通常我食飯既速度都快老公好多, 咁我就去翻熱返d隔夜湯啦, 其間經過廚房門口篤嘔嘢都好步步為營, 點解唔抹?梗係啦, 老公響度梗係等佢攪啦!hehe...

d湯煲煲下見佢好似濃得好過份咁, 咁咪死去攞d滾水溝淡佢囉, 咁對眼望住個熱水壺就撲過去攞, 點知,完全唔知發生咩事! 我突然明白咩叫撻生魚!我突然好似比泰臣舉起再重擊落地, 我仲突然覺得地板條隙好多塵!呢一刻我先知, ok, 我仆街了!

咩事我會仆街架?我擰轉面見到篤嘔嘢唔見晒咁滯, 去晒邊?咪響我鞋底同個身度囉!吼!!!頂係咪要咁潺呀!!!

咁我定左形訓響地, 我老公認為我受重傷起唔到身, 死過黎意圖逗起我格拉底!吼!頂兄弟你唔係唔知咩叫做跌落屎渠寧願直接死左就算既道理呀!吼!我極度唔想起身面對我成身嘔嘢既現實囉!吼!

ok,我自己識起, 第一時間梗係衝去浴缸,換衫, 掉拖鞋!我老公仲話洗一洗咪著得返囉!無嘢呀, 成個鞋底都係厚切嘔嘢! 我用個痰罐洗乾淨消埋毒裝粥比你一樣道理, 你食唔食丫!洗乾淨對拖鞋都唔會開胃再著啦!吼!唉...其實我真係傷架, 成個右邊身有幾撻黑晒, 手掙流血...不過!我呢d新陳代謝咁快既賤骨頭而家已經好得7788啦!同埋已經好好彩, 起碼無撞到d角, 更加好彩唔係個口撞(食)落d嘔嘢度, 最重要無撞到我美麗既臉蛋(想嘔就嘔吧..hahaha)。

好喇好喇, 講返食喇!
呢個芝士粟米餅係突登整比我個粟米控老公食既!好鬼簡單, 當中既粟米因為我見新鮮既唔係好靚所以我今次用左罐頭。係好簡單又好味既餸!

先將粟米攪爛晒, 大約80%好啦, 唔好攪到滑晒咁

加兩條燕麥糠

加埋1隻蛋,芝士片3塊, 鹽,黑椒, 麵粉兩湯匙

攪勻佢!(喂呀, 好似我踩到果d嘢呀!hahaha..)

煎得!煎好一面先反轉再用鑊剷按扁

攪惦!easy job!食落好似粟米湯味, 仲有溶溶地既芝士岩晒粟米控!

p.s.如果覺得稀難煎, 寧願加多d燕麥糠都唔好加多麵粉, 因為太硬唔好食架!