去美國發癲 - 紐約篇

話說去紐約係響我去美國前大家一早plan好左。因為爸媽有事要去一去紐約, 所以就決定不如全家一齊去stay一晚作為一個短短既家庭旅行。

好喇, 一早定好日子就租架大車, 訂好酒店, 有邊度想去既一早訂好晒飛先。但有好多野真係人算不如天算!!

晨早流流食完早餐就出發,車程大約5個鐘。響波士頓時無落雪, 周地都仲係雪,而嗰種凍其實已經習慣左。  大約中午時到左紐約, 嘩正呀喂有太陽!

你呃我唔到既, 如果係香港, 有太陽我都會信你有d暖, 但不適用於此地囉!因為早個幾星期紐約先有輪超喪既怪獸暴風雪, 但出奇地路邊連丁點雪既痕跡睇到!

爸媽要去唐人街做佢地既嘢。eeee...唔中意呢d樓梯, 覺得住響裡面好無安全感。

當佢地辦好佢地既事加同人一輪social後, 已經成3點!!

跟住我地就去行行逛逛, 逛左去world trade centre, 先去左紀念館。講真, 睇到d畫,d模型,某d人和事既紀錄, 係勁sad!!妖拉登真係正一死仆街!

之後就行左去world trade centre遺址喇!

當時呢個好似雀叫oculus既車站仲未開, 但真係堅堅堅型!

我地快逛, 因為極當風, 所以真係極凍!!

天開始黑, 妹聽朋友說有間泰式素食好好食, 於是我地就去啦!
跟住落黎既事我就好似斷左片咁, 我只想講, 因為真係好很凍, 凍過波士頓100倍!!頂, 我之後睇返新聞, 我地真係好灰鞋, 原來我地去嗰日係紐約二十年黎最凍果日!!!!!!!!!!!嘩頂!加埋風速, 真實感溫係-23!ok, 其實我想講低處係未算低!

我話我斷左片, 係因為我唔記得點解我地要山長水遠要去食泰國素食; 我唔明點解我地點解唔揸架車而要響條街凍到變僵屍咁行(仲要行錯), 因為如果嗰一刻我有d理智我會即刻收我妹皮!而當時既我, 因為無唸過紐約會凍到咁既地步, 我係凍天衣著, 但唔夠重型, 起碼無帶我件大羽絨..鳴鳴..嗰一刻, 我就好似龜咁盡量收起我既手同埋口, 又唔知點解最後去左搭subway...

跟住食左一餐勁不外如是既一餐, 我地一致認為阿媽比佢地煮得好食1000倍既一餐, 我地就要去山長水遠去攞車去new jersey既酒店!
途中, 老豆指住一架巴士同我講架巴士係去波士頓的... 
嘩, 我即刻抓狂大叫我要返波士頓!!我要返波士頓!!!
佢話, 到左都仲要搭車先返到屋企, 無人接你架喎!
我仍然抓狂 :我搭的士...我要返波士頓!!!我要返波士頓!!!
妹話,返到去成屋得你一個, 返到去係凌晨... 我仍然無停過..我要返波士頓!!!我要返波士頓!!!

..............................................成車靜音..........................................
結果梗係無人理我啦..hahahhaha.....

我頭先話低處未算低, 係因為原來new jersey仲凍!!!!
上到房, 本來我地book左一間for family既大房, 起碼有廳, 有3張床, 有房中房咁, 但係變左無房中房, 同埋只得2張大床!呢一刻我地大家都有d精盡人亡既感覺, 事叉爛但!!!求其叫佢加兩張床算喇!!!我同細妹落左酒店小食部買野食, 見到個店員同佢打招呼, 佢突然崩潰咁話今晚突然太太太凍, 佢著唔夠衫, 一陣走時一定會凍死...嗚嗚嗚...我明白你架!
連當地人都咁講, 我釋懷喇!hahahhaah...
上到去, 我見到嗰兩張所謂床, 唔洗麥玲玲, 我自己都算到我第二朝會腰骨痛!

唉! 事叉爛但!!!
就係咁, 阿爸媽梗係訓大床啦, 阿大妹&老公都係訓大床啦, 因為妹夫揸成日車梗係要訓好d。咁咪就係我同細妹兩條蛋散訓呢兩張d彈弓鬆晒兼張扮床縟既布(總之成彈嘢都無承托啦!)
最可怕係!!因為太凍, 所以成間酒店既暖氣倒冧咗!!omg!!!唔係凍既, 係好唔夠暖!!!我忍唔住真係要盤下大妹點解要住呢間!佢話佢響加拿大住過係好好,又靚又好服務又乾淨, 唔知new jersey呢間咁恐怖..唉...咁又係, 睇表面佢又真係又大又靚既個景都幾靚既....

第二朝, 我係第一個起身, 嘩頂洗唔洗-35呀!!!!

個湖結左冰!尋日都未結晒!

不過咁, 有準備就唔洗驚,我地個個包到自己密不透風, 我用我條大勁巾, 連頭帶耳仔帶頸咁包住先著褸, 再加埋兩對襪, 掂晒!

食完早餐我地去左American museum of natural history, 即係電影 night at the museum 嗰間museum!!!好興奮!!!好在大妹一早上網買左飛, 嘩條人龍長到吖!真係好大好多嘢睇!!

d動物真到嚇死人!!好似真係會爆玻璃行出黎咁!!

呢part講化石

人類史

化石

我地最後行左4-5個鐘就要揸車返波士頓lu!

雖然過程好似好想死咁, 但其實可以同屋企人一齊經歷呢個有趣既經驗真係十分十分難得, 好值得記低!起碼響最凍時, 我響心係咁鼓勵自己!我要珍惜每一次同家人經歷既一切!(好誇!轉頭咪又變返港女發癲..hehe)