日式涼拌貓耳仔

其實呢我好鬼中意食雲耳木耳呢類涼拌, 但就好少整。一來因為懶(唔洗講!)二來之前整過兩次, 覺得自己整得唔好食囉!一心唸住撈埋一齊就得, 但總之就唔好味!

早排有同事響屋企拎左d佢老婆整既涼拌返黎, 嘩頂!真係好正!於是乎又了起左我自己整既心!於是叫同事返去問下老婆, 再加上一d資深師奶既意見, 我終於整到好好味既涼拌喇!!原來我以前將所有嘢都簡單複雜化, 只係好簡單, 就已經好好味!但當中都有d小小秘技。

用貓耳仔, 絕對係因為懶!因為佢本身已經細粒(像貓耳仔一樣), 所以係唔需要切/撕細塊, 仲有嗰粒"掟", 大雲耳係硬硬的,要剪, 而貓耳仔唔無"掟", 就算有, 都可以唔洗剪, 好方便呀!!

拆開個袋大家睇下!仲有既係, 我自己覺得貓耳仔滑d!

將貓耳仔浸軟, 略洗,再用滾水輕焯, 睇下大咗幾多!

秘技一 :輕焯完用凍滾水加冰浸住放入雪櫃一個鐘, 會爽好多架!

好喇, 而家開估係咩味喇!我今次係整日式醬油味!

材料只係 :

刺身豉油

wasabi

麻油

芝麻

先將豉油同wasabi溝好你自己想要既咸度同辣度再撈入已雪完同隔好水的貓耳仔中!

秘技二 : 將撈好既貓耳仔放入雪櫃最少12個鐘, 期間如有時間可以間唔中翻動一下。

秘技三 : 到雪完真係要食喇, 才好放入麻油同芝麻!

咁樣就可以食到又入味, 又香既涼拌貓耳仔喇!yummy!

響打呢個post既時候, 我已開始為我既新年返外家既行程開始緊準備, 係係係, 仲有兩個月先到, 我認我既holiday mood爆晒燈, 我認我係小學雞去旅行興奮無比, 因為今次會stay差不多一個月, 所以有好多時間周圍去...好喇好喇, 一講又停唔到咁, 遲d再同大家分享長篇大論..hehe