戚風,雪芳,Chiffon - 我的成魔之路

戚風,雪芳,Chiffon, 不論叫咩名都好, 都係一個表面平平無奇, 食落令人心花怒放既蛋糕; 睇落平平無奇, 但整起上黎易學難精既蛋糕!不過都係果句, 自古成功在嘗試, 我打死都唔信, 我做100次都整唔到一個令我自己滿意既雪芳蛋糕。

我唔係好明我個人發生咗咩事!明明我係一個超級hea爆王, 明明我係3分鐘熱度既人, 明明從來都無咩進取心勁易放棄既人, 但我竟然同一個蛋糕大戰咗咁多個回合都唔收手。

經過我幾個星期既刨書啦,刨 forum啦, 刨 blog啦, 密集式咁試做啦,好明顯係有進步咗既, 但未去到最好囉我覺得, 因為我未試過人地自家製既雪芳, 無得比較, 有無人可以整完蛋糕請我食, 等我知道其實自己整係點...haha...講笑...而家就睇下我既成魔之路..我大大話話整左十幾個, 有d太不堪入目, "the 皮"到唔想影相..haha

蛋白蛋糕大家響之前都睇過, 就係老公生日蛋糕, 我唔中意呢個食譜, 因為有成8隻蛋白, 好誇張!同埋有少少過左火位, 同焗爐仲未夠friend..haha..側邊有摺痕..

伯爵紅茶蛋糕大家都係見過, 缺點係中間有大窿窿, 切完之後偏咗d, 虛有其表, 而且脫模功夫仍然好green, 岩岩巉巉!紅茶味未去到濃濃的, 有同事唔知自己食緊咩味(so sad!!)by the way我用咗兩個茶包。

綠茶雪芳好可怕, 水份用咗奶, 因為想好moist既口感, 多了少少油同水, 點知出黎既效果係1.發唔到高2.好很油囉!!!拎上手有油!!!3.好實4.漿口...失敗!失敗!失敗!

 

咖啡雪芳有d曙光啦!鬆軟,moist,好香!but!唔挺, 好似無腰骨軟皮蛇,唔知係咪蛋白打衰咗, 所以即刻再整多一個(好癲!)頂又變咗焗唔透! 失敗!失敗!失敗!請晌問有無人可以話我知點解咁樣呢?

 

柚子雪芳嘩真係有曙光!亦第一次唔用刀,用手起模, 好好玩好有滿足感呀!!各方面都滿意!但仲有唔好, 就係衰多手加咗糖漬橙皮,沉底搶火, 而且整體黎講有d乾, 未去到我盲目追求既moist moist口感, 但已經令我信心大增啦!

終極再戰伯爵紅茶成成功啦!我無憾啦!各方面我都滿意啦!不過我無加多d茶包, 突然驚會變苦, 但脫模既功夫仍然要勤加磨練呢!真係好開心好開心呀!!不枉我老公同我d同事做白老鼠做到嘔!而我都覺得我肥咗呀!!hehe

 

我的終極食譜 :
8"模
材料 :

A/ 
蛋白180g
糖50g(已減)

 B/
蛋黃70g
水60g
葡萄籽油60g

C/低筋粉90g

D/糖12g(亦減)

E/紅茶粉8g(已加)

1.蛋白冰箱雪10分鐘至邊有少少冰
2.A打至企身
3.B攪打混合再加入C
4.產生黏性加入D攪勻再加入E
5.將蛋白霜1/3加入蛋黃輕力拌勻
6. 倒回蛋白霜中cut and fold至勻,倒入模中輕敲
7.放入已預熱170度焗爐焗30分鐘 
8. 取出輕敲再倒扣至涼脫模