椰菜絲沙律＋偽煙肉

好攪笑，呢排上網見到個漫畫，意思就係，疫情過後，你我他都會變晒廚師!哈..真係好啱，呢排零出街食飯，只係好幾次真係技窮買咗外賣。其他所有日子，由新年前到而家，都係煮煮煮煮煮....唔變大廚都幾難。

跟住我同我老豆咁樣講，佢話，超，好叻咩!你媽煮足幾廿年一日煮3餐tim ar...okok...你老婆最叻喇!我仍然係嗰句：我唔適合做全職家庭主婦，因為我真係做唔到咁賢良!😂

不過，呢排因為我唔想我老公死去買三文治，因為我怕烏糟，你知啦，非常時期，如果食物中毒都唔會去醫院阻住地球轉，於是我又重拾返之前令我覺得乏味嘅整麵包生涯喇!

尋晚臨瞓又上網睇下片唸下今日晚餐煮咩好，睇到條片兩條女試食完個樣好誇，攪到我都心郁，即刻整嚟食，就係用磨菇扮煙肉喇，我相信幾咸，於是整埋椰菜絲沙律試下夾唔夾先!

先攪椰菜沙律先!
直接用刨刨，我認我刨完成身都係😂

因為呢個係有機菜，咁我用少少鹽水浸一浸，如果唔係有機，我會快手用滾水淥一淥。跟住隔水放入雪櫃待用。

跟住將磨菇切薄片

用0.5茶匙豉油，3茶匙油，手指夾份量鹽，胡椒粉，撈勻，平均放上焗盤，190℃焗15分鐘，攪惦！

椰菜絲加沙律醬，灑上磨菇，食得!
嗱，其實我唔係太記得煙肉咩味，但佢好似嗰d 一樽樽乾煙肉，即係圓形粒粒食沙律嗰d 呢！好香，同椰菜沙律好夾，好味!

有椰菜沙律，梗係配埋爆汁日式咖哩啦!正啊！

一post一花：
好少見較剪蘭，人地插得好高雅，我插到好好似 癲婆頭咁😑