食粥粥食粥

呢排超市都頗多貨架係空, 其實都唔知搶嚟做乜春, 夠用咪得!

我個人又懶又hea,呢d咁進取嘅嘢永遠都唔輪到我做!我嘅結論係搶廁紙搶米搶到成座山嗰d太太, 你哋真係好勤力啊!!*曲線要註明*,🤣

我就好佛系嘅, 都無咩存貨響屋企, 如果返工出開街就會順便買埋餸, home office嗰日就完全唔出去喇, ok吖, 咁樣都run得幾好吖!
反而我去超市嗰d時間無咩人,係比有疫症前更無人, 仲好行!樣樣都睇下研究下咁,行得好舒服lor!

好攪笑, 有時d老人家見你d後生睇一樣嘢睇咁耐,最後放埋入購物車, 佢一見你行開就會行埋去攞起,戴埋老花鏡睇下你睇嘅係咩, 好可愛!!又會響你則邊扮自言自語:唔知咩嚟架呢!
hahaha...扮咩扮, 其實我好樂意好詳細話比佢地知..haha..
唔知係咪我個樣太平易近人(hahha..唔好嘔),我真係成日遇到呢d老人家!當然! 如果有d係無禮貌又老奉咁, 我會即刻用殺人咁嘅樣令佢彈開!🤣

不過而家呢個環境,當然同陌生人保持距離啦!!!唔係咁灰鞋仲企響條街講嘢呀!

早排突然好想食粥, 其實我無煲粥好多年, 食都好少。我至細好中意食紅衫魚, 細個我媽煲親腐竹紅衫魚蓉粥, 佢地會每人畢一碗, 剩返成煲都係我嘅!!!hahha...所以我至細已經成個波咁唔係無原因嘅!!

愈扯愈遠tim!好喇,咁而家唔食肉就唔食紅衫魚啦當然, 而且唔會為咗煲粥而突登落街浪費一個口罩啦!突然唸起有一次響加拿大, 我地全家8個人齊晒腳, 咁我記得我臨瞓前見到阿媽仲未瞓, 起身時又見到佢起咗身, 仲有一大煲粥!嘩我問佢係咪無瞓過, 佢話只係早我地少少起身, 不過佢一起身就浸定米。本來我唔想食費事突肚腩出街, 見個個都食又試兩羹仔, 好好食好綿啊!!!最後我狂食仲同我妹爭最後一碗,癲架!突然好掛住一家人齊腳發癲嘅日子!

好喇好喇!!我真係入正題喇!haha...究竟我媽煲咗咩粥令我地瘋狂呢?(其實我地餐餐都瘋狂), 材料極簡單, 隨手有!

米我洗咗用鹽,油,水浸一陣, 我好求其, 浸咗米就去瞓梳化，hea完d米已經索晒d水!大約一個鐘。

料真係就咁多!無喇!!令成煲粥綿嘅就係佢!雪耳!浸完剪到極碎(唔怪我食唔出, 我媽唔講我都唔知道! )另外兩樣係粟米,生菜絲

嗱我唔side嘢嘅, 刮完粟米粒剩返粟米心同鬚留返第二日煲湯!

大滾水落米,滾10分鐘落雪耳碎,粟米粒, 由佢一路起勢大滾,大約40分鐘,落生菜絲,攪勻落豆漿, 再滾起時熄火閂蓋。
到食之前先開蓋再滾返起, 落鹽調味，我仲會落d蔬菜粉,可以唔落。
*最少焗15分鐘
*寧願唔夠水再加,都唔好一開始落勁爆多水, 要留返之後落豆漿，我開皮份量係1乜米，2000ml 水。
*唔用豆漿可用腐竹, 但一來我屋企無腐竹, 二來其實我只搵到一處買到會溶晒嘅腐竹, 所以我覺得用豆漿方便d!

睇下真係堅綿!而且食雪耳又潤, 頂吖而家見到張相又想煲!其實粟米+生菜絲已經甜, 加埋豆漿好香, 有時好味真係唔洗太多花臣。

加埋蘿蔔糕,食咗3碗粥, 我是一個波!hehe..

一post一花 :

如果你有留意我Post嘅花, 唔好以為我用舊相, 而係我真係成日買桔梗!haha...因為又靚又好插!

因為新年前買嘅花一路都未謝, 所以好耐無去花店, 尋日去到, 個店主都話生意少咗, 於是我就買咗好大扎喇!大扎到我老公話好驚個花樽會反!haha...

雖然我知道係染色, 但呢隻係我最中意嘅藍色, 真係好靚啊!