由冷氣狗變暖氣狗

我又潛水咗一輪了><

響新年前, 響完全唔知做乜春嘅情形之下, 我對腳細菌感染。

話說響我發現前大半個月: 
我覺得自己成日都好攰好眼瞓, 我以為自己因為懶,我一放工就瞓;
我成日覺得4肢骨頭好酸, 我以為我唔夠鈣, 我去補鈣;
身為一隻冷氣狗,我成日覺得沾寒沾凍,我以為自己虧,唸住去睇中醫;
我見對腳有幾點紅又甩皮,我以為濕疹,我去咗睇皮膚科....

到我做咩都無樣嘢好過時, 對腳愈來愈紅腫, 我去睇我親愛的家庭醫生, 佢一睇就話我細菌感染!!咩菌咩原因已經無從稽考, 因為已經染咗一段時間。即刻我已經發燒大半個月!!於是我足足食咗20日抗生素!!20日!!大家都知抗生素係將好壞嘅菌都殺晒,因為不停試藥/轉藥, 醫生話如果唔係我後生強壯佢都未必會咁開, 但幾壯都好, 我真心我而家虧到仆街!而家虧到BB仔都可以打死我, 而家響屋企,我老公著背心,我就羽絨+暖爐,以前成日比我串虧嗰d人, 而家都報仇笑返我囉!!但好在總算殺晒菌好返喇!

而家開始補充緊營養,希望盡早變返一隻熱血冷氣狗!!好在我行業新年放好多日假,我十幾日假期只係出咗兩日街,好癲啊!

亦因為今次過程太痛苦,我唔知點樣去形容嗰痛苦, 唔係話血淋淋痛到你典床典蓆嗰種, 係脹,痺,麻,痛嗰種,24小時都係咁,好難受!我個人本身極少喊, 更加唔會響人面前喊,或者醫生感覺太慈祥, 去到10幾日最痛苦時, 我一見佢一開始報告比佢知食藥反應時, 我點忍都忍唔到,望住佢大喊, hahaha...如果醫生係個靚仔就即刻變咗韓劇feel...hhahaa...可惜佢係一個戴咗假髮嘅慈祥uncle(點解我知?有一次打風, 我返到屋企樓下,見佢一出診所太扯風, 成個假髮歪晒, 我收唔切個O咀,好賤呀我)好彩睇咗佢10幾年, 而且呢個醫生係好穩重嗰d款, 佢見我收晒聲發洩晒之後佢好詳細解釋比我知點解而家有呢d感覺, 係康復必經階段, 聽佢講完內心都好過d, 而佢都針對呢d hard feeling開過d藥比我。就係咁我20日終於好返!

可能我人生太幸福無咩經歷過d太慘嘅事, 可能對其他人嚟講係不值一提嘅事, 但呢20日, 令我唸咗好多嘢, 響最痛苦時, 支持我嘅都係身邊人嘅關心, 我老公當然咩都就晒我, 就算日日都食外賣都無咩出聲, 我爸媽每日一個早上一個傍晚打比我問候我, 都係令人感覺好warm!雖然過程痛苦, 但我知好多事冥冥中自有主宰, 可能個天就係想我不要過得太舒服無危機感呢, 當然我而家更加會珍惜健康嘅自己!

亦因為唸件事, 我已決定我真係以後只吃素, 我會連我最愛嘅魚蛋,炸魚蛋,紅衫魚,倉魚...永別了...HAHHAHA, 以後呢個BLOG連魚都唔會再出現了!但我會研究多d重口味嘅齋菜嘅!

哎好很煩呀覺得自己好似喃嘸咁長氣!

分享下我而家點補充營養, 因為我唔係太識呢d嘢, 盡量想天然d.

一早起身 : 1杯黑糖+薑(補血氣)
中午 : 1杯維他命c 
晏d : 1枝益力多
食完晚飯 : 1粒20billion 益生菌
臨瞓之前 : 鈣+d

另 : 清水+生果+營養湯 : 無限

但我仲好怕凍又唔太夠氣, 大家知唔知可以煲咩飲呢?我知應該係北氐黨蔘, 但配咩煲呢應該, 定係焗水都得呢?

一post一花:

新年前買, 唔想間屋太死氣沉沉, 插到而家都未謝,勁!