網頁

19.2.20

照燒雞脾菇


呢排出街要帶口罩唔洗查唇膏,為咗擋口水(好多人噴我口水?hahha..)無戴隱形眼鏡直接帶眼鏡,唸住無人認得,個頭都無突登吹直就出街,成個雀巢咁,好烏wear..hahha...點知有一日我老公話,嘩兩截色嘅!係!因為我化妝只化鼻樑以上...hahhahaha....一除口罩就現真身!!

呢排d人咩都搶,好在我屋企咩都有少少,用完至算。口罩得20隻,好在上美國網買咗,送去爸媽屋企,我家人驚寄到嚟之前我已經見底,嘩大嗱嗱用咗成us$2xx ups比我,我媽仲話自己女緊係不顧一切,好型啊,好有愛啊!但太貴了!

呢排完全無出街食飯,日日煮,煮到呆咗,煮到技窮,煮到絕望..haha..晚晚臨瞓盡量唸下以前食過咩煮過咩比靈感自己。有晚唸起N年前同爸媽去志蓮淨苑食過一個好味又濃味雞脾菇,因為雞脾菇通常都較味淡,之後好似試整過但唔成功就不了了之。

隔咗咁耐exactly味道唔太記得,惟有用模糊記憶+自己style煮。

有次睇大師姐佢教菇菌要唔濕水又要乾淨,就係用廚房紙濕水扭乾嚟抹乾淨d菇!

煎完有d縮,所以厚切,
想佢入味d,所以界十字。唔洗調味。


菇同牛油完美配搭,用油煎一面到準備反另一邊前加兩粒牛油,頂吖即刻香到想偷食!

唔洗郁佢,煎到無煙出即係水份蒸發晒,就會金黃色,就可反轉。

預備照燒汁,味淋,料理酒,日本醬油,糖,老抽,水,大約份量係2:2:2:1:0.5:0.5
老抽我係突然好想深色d後加,唔中意可以唔落,記得試味。

仆佢個街呢個咩世界,超市已經無咩嘢賣,連碎紫菜成世都無人賣嘅嘢都賣晒!ok,用屋企包壽司紫菜剪碎佢囉!只係唔係味付。

照燒汁倒入煎好雞脾菇,兜到汁開始杰就上碟,嬸埋紫菜碎食得!

雖然唔係好記得志蓮食嗰d味,但我非常滿意今次味道,唯一不足係份量太少XDXDXD

一post一花:
無呀無呀無呀無花呀!!痴鬼線年廿八買棵嘢仲好茁壯,唔洗買新花!不過前兩日洗士多啤梨,見到粒肥矮,覺得好有cuteeeeeee影低咗,share比大家!

12 則留言:

  1. 呢個餸好簡單易整,不過要放牛油就no way
    我想幫屋企人買口罩時,藥房已無貨,都有貨想寄時,又話唔收中港既郵包,唯有託人用公司名義至寄到出去

    回覆刪除
    回覆
    1. 我爸媽去勻quincy所有超市藥房都無晒,我突然唸起於是去Walmart online 竟然仲有一款有貨,原價$8.99已變$16.99/盒,即買!點知過兩日睇已變$69.99!!!!!

      刪除
  2. 呢個好味呀!
    其實我屋初時都得幾個口罩,我冇去排隊呀,見步行步,後來俾我在網上搵到一盒頂住先,俾家人返工用,我自己就好少出街。

    回覆刪除
    回覆
    1. 其實我哋都好少出街,就算要買嘢都group埋一鑊過,但返工真係每日要用一個,不過而家好彩收到爸媽寄嚟嗰d個心先定d咋

      刪除
  3. D菇好似想扮帶子喎,係唔係?
    其實味道呢家嘢除咗傳統的,仲可以創造發揮其它唔同口味道,要接受新配搭呀💪😎👍

    回覆刪除
    回覆
    1. 個樣似帶子啊,口感都有d似!
      咁呢個配搭你buy唔buy先

      刪除
  4. 好得意, 好似食棋子咁.
    隻士多啤梨都好Q呀, 見到都開心.

    回覆刪除
    回覆
    1. 棋子都比你唸到!!
      隻士多啤梨q到比我一啖食咗lu🤣

      刪除
  5. 你整得好靚呀,我諗好味過志蓮淨苑個D添!
    我一星期都有出去食一兩次,輕鬆下順便支持下飲食業~~
    PS 個士多啤梨超可愛呀:)

    回覆刪除
    回覆
    1. 有機會我都想去多次志蓮淨苑食多次,不過對我嚟講d隔洩。
      我唔敢出去食哦,極其量都係買外賣返嚟ja

      刪除
  6. 呢碟雞脾菇一定好好味,見佢無嘜點縮水,又無煮到出晒水👍

    🍓真係好得意,好似荷包仔咁

    回覆刪除
    回覆
    1. thanks!!其實一放落去佢有出幾多水, 由佢唔好理佢, 煎到佢乾晒無晒水出佢就會變金黃色先反面,咁就唔會水汪汪!

      刪除

LinkWithin

Related Posts Plugin for WordPress, Blogger...