新豬肉餅

好攰啊呢排, 除咗工作上要趕死線之外, 個心都好攰, 我呢d 8,90年代長大嘅人,響最幸福嘅一個年代, 低能兒童真係快樂無窮, 十幾歲仲係成舊飯咁, 邊有經歷過而家嘅局面...不過我相信堅持到底就是勝利, 滴水一天總會穿牆, 希望快d可以見到曙光!!

呢排都無咩勁大意欲整嘢食, 都係煮來煮去嗰d。但我成日都會發夢食嘢..hahah...有一日發夢食龍蝦e麵, 真係好想食啊, 本來唸住出去食, 因為我唔識亦唔想處理龍蝦, 點知同老公行超市見到有急凍龍蝦尾賣,$250/4隻, ok wor, 我唔知貴定平, 但起碼唔洗我去接觸活生生好好多!好hea咁買兩罐龍蝦湯做汁, 好快就整好個龍蝦意粉, 好滿足!

之前知道新出咗隻新素食, 叫新豬肉!傳說係勁似真嘢, 同埋較為著重營養成份嗰part, 我一路知道響灣仔間素食超級市場有得賣, 但一路都無咩時間去買, 點知有日見到屋企附近有得賣, 哇好開心呀, 即刻買咗一包返屋企試下整!

可以睇下背面成份介紹

我第一樣要試整嘅係豬肉餅, 好多年無食喇, 我成日都好想食, 好掛住啊!!
我響冰箱拎出嚟, 就咁連膠袋用水浸嚟解凍, 半個鐘已解好晒, 証明裡面無咩水份。
倒出嚟好lim啊, 好迫真係..hahaha

我通常整假肉都會100%用返整真肉嘅方法做。
我自細響屋企食嘅豬肉餅, 我媽係整雞蛋咸蛋style, 如果佢整梅菜, 魷魚嗰d我通常都唔食, 久而久知佢惟有只整一款..haha

調味只係簡單用豉油,糖。
同真嘢一樣, 一路遂少遂少加水撈到融合, 直至成個肉都輕晒唔實就攪惦!咁樣蒸出嚟就會食到好鬆化唔會死實。

加入雞蛋先

都係我媽style, 我相信佢當年係唔想一個人了晒d咸蛋黃(細路仔嘛!), 所以切碎平均分佈咸蛋, 蒸得!

滾水計蒸10分鐘, 好正咁啊!

橫切面好似!

總結, 口感有90%似, 味道70%
始終豬肉餅係一樣好食到豬肉味道嘅餸, 而假豬肉始終都有自己嘅味, 唔可以太高要求。我下次會用嚟整濃味嘅魚香茄子煲同埋肉醬, 我想信一定好似!

but, 對於我恨食豬肉餅嘅渴求, 絕對已滿足到!hhaa...如果有時唔想食d高脂肪嘅肉類, 可以一試啊!

一post一花 :
呢排太熱, d花都開得好快好唔襟擺, 但呢隻好襟啊!仲好靚好得意好特別。

佢個名叫星球花!