蒜蓉粉絲蒸扇貝新嘗試

頂,我新年時唔知做咗d咩衰嘢, 好肥啊!

我以為呢個肥會響我返咗工之後回落返, 有係有嘅, 好慢囉!!hahah...

早前咪話我老公新年入醫院嘅, 頂佢出咗院之後, 胃口大咗好多好多好多好多好多!!咁佢就不嬲都係大舊佬, 以前其實食得偏少嘅, 我相信而家佢就真係食得符合佢體形喇!佢而家講得最多嘅係:仲有咩食?

hahha...喂你唔好理佢咩原因勁食, 我就當佢好捧場覺得我煮得好味。咁為咗滿足我自己呢份偽成就感, 我呢排就好有興趣煮嘢喇!咁就變咗佢想食--->我煮得開心--->佢係咁食--->我係咁煮--->我跟住係咁食--->我肥晒。瘋狂咁loooooopppp落去直至我地變成兩個波...hahah...

ok, 入正題, 有日發姣發凳買咗d急凍扇貝, 妖一時鬼迷, 其實我隨手已經可以買到又大又新鮮, 重點係去街市買人地會清乾淨比我, 而家要自己整><

唸起之前睇咗個蒜蓉粉絲蒸蝦嘅食譜, 佢講咗d秘技, 等我一於抄考下先!!首先係粉絲, 因為我不嬲都係用凍水浸覺得咁樣先會入味, 但佢用熱水浸到透明, 隔水, 咁我就撈咗少少麻油老抽再放上帶子面。

跟住整蒜蓉, 秘技係加一磚腐乳o.O!
其實我本身唔食腐乳, 但話加咗會多一份咸香味, 唔會有腐乳味,咁我去買咗一樽=='

咁爆香蒜蓉,加鹽,糖,麻油,炸蒜,腐乳調味

放埋上去, 大火蒸6,7分鐘,食時淋少少甜豉油, 好好味呀!!真係無我好憎嗰d腐乳味, 但好香呀!!

同埋用呢個方法浸,撈粉絲真係唔會蒸完乾硬, 好正正呀!

參考食譜 : 奄尖鬼食堂