牛油果鰻魚炒飯

呢排極恐怖, 酷熱天氣唔洗講已經夠恐怖, 公司冷氣壞咗, 已經熱咗我成日, 放工去萬寧, 低頭睇嘢時, 見到自己d汗滴落地, 嘩以為身體倒數爆炸, 點知見個個都係咁, 原來佢地部冷氣都壞咗, 跟住去禁機, 嗰間房平時勁凍, 點知一推門入去, 簡直零氧氣!好明顯佢嘅冷氣都壞咗!跟住去7-11買嘢飲, 仆佢個街, 唔L係呀, 連佢地都壞冷氣?!!冷氣機比人阻咒被滅族嗎?!?!?!

我覺得我人生其中一個做得好啱嘅決定就係換冷氣!本身嗰部其實已經用左8年!但佢嘅下面係龜缸, 不論洗又好換又好, 唸起都超唔方便好煩!但佢堅係愈來愈唔凍, 我響屋企又想人體爆炸!我一行埋我老公隔離佢就尖叫, 因為佢話我令到周邊嘅氣溫都熱晒!hahah..講緊係未去到好熱嘅時候!好喇好喇, 終於響垂死時的起心肝換咗佢, 趕得切響呢排酷熱天氣前攪惦晒!嘩頂而家日日攬住部冷氣爽歪歪!如果今件唔換, 我唸我都捱唔到今日!><

換咗冷氣就可以返入廚房攪嘢喇!順手清下d物資!我平時都幾中意食鰻魚炒飯,多數都會去壽司舖買返嚟炒, 不過話明清物資, 所以就用咗上次整壽司時買多咗嘅素鰻魚嚟炒, 說穿了其實佢只係腐皮加紫菜, 重點都係落響d鰻魚汁上!

材料係勁簡單同隨意, 我係用 :

• 白飯 - 4碗(okok, 我認我係飯桶!)
• 大洋蔥 - 1個(絕對堅要一整個!)
• 真/假鰻魚 - 1pack(用真用假都係一樣整法!)
• 甘荀 - (半條物資)
• 熟透牛油果 - 1個

調味 :

• 日本醬油 - 丁屎咁多吊味
• 鰻魚汁  - 如果我好有心情會煮, 唔係用現成買都得!今次係用現成!hahaha

(鰻魚汁煮法: 味霖煮滾加日本醬油, 再滾+麥芽糖煮至杰)

先處理好鰻魚, 都係嗰句, 真假鰻魚處理方法一樣。我將原條先焗香, 再切丁。

加鰻魚汁兜勻, 盛起備用

哈哈..至於飯呢, 我唔係單純地炒既, 我用一個兜一早將d鰻魚汁同飯預先撈勻, 因為一來, 可以整鬆d飯, 二來因為鰻魚汁有糖, 好容易黏鑊, 預先撈咗就會咁哩hea!

我唔中意食到洋蔥同甘荀, 但又一定要有佢地嘅味, 所以切細細粒/攬碎。當然我咁勤力, 必定係攪碎..haha..先爆洋蔥後加甘荀, d洋蔥好多汁, 勁死大煙!

洋蔥同甘荀炒到咁上下, 就倒飯+鰻魚+芝麻快手炒勻!

最後上碟, 再灑切粒牛油果。why?其實係有一次無意中清物資就求鬼其加左d牛油果, 發現同鰻魚炒飯係夾到天生一對咁！夾到好似叮噹同大雄一樣, 不能分離!!hahahaa..放心就算你唔中意食牛油果都唔怕, 基本上係食唔出味, 但當你一羹炒飯中有埋佢, 成啖飯會勁smooth!creamy!好正好濃呀!(停喇停喇, 浮誇到自己都想嘔!hahah)

我老公係豆怪, 我都加咗一咋青豆比佢, 佢都話好夾味呢!