倒數假期

我呢處係荒廢的樂園嗎?!死啦死啦, 咁耐無update, 大家有無唔記得我呢?呢排堅係好忙,好多野prepare, 癲咗!

我唔明我要緊張咩, 但愈接近美加行, 心情就好似小學雞去烏溪沙旅行咁坐立不安。可能十幾年未試過全家完整聚頭, 始終大家分佈在地球幾個角落, 如果唔係咩大件事都唔會齊人, 總會少一兩個。

就好似今次細妹結婚, 大家就真係蒲晒頭。頂, 我覺得我仲誇張過自己結婚咁..haha..主要張羅梗係裝身行頭, 響呢個過程, 自己個心同個口不下講左十幾次:最衰咁鬼早結左婚!當時真係太年輕太green, 對好多嘢都好鬼新奇咁, 變相咩都話好好好, 即係無要求。而家個人大個左識得所有頭飾, 晚裝, 化妝,鞋,手袋遂樣襯靚靚。響訂晚裝時, 個事頭婆以為係我自己結婚, 見我尖晒叫話點解結婚時唔識去搵d咁靚既裙著, 佢先知其實我係去細妹婚禮, 佢仲話你咪等10周年紀念著靚靚影多次囉!我話比佢知10年都過埋, 已經結咗婚12年, 嚇死佢即刻問我幾歲..哈哈..其實因為我好後生已經結婚啦..哈哈

因為老公放唔到咁耐假而且我們都唔放心dingding,所以決定我一條友過去,有呢個決定時,起初既心情係我唸起第一次要同老公分開兩星期咁耐, 未出發先掛念; 而佢條死嘢當我問佢將會咁耐唔見我係咩心情時, 咀角微翹地說覺得自己似放監!!! hhahaha...死嘢!!  

但當到了現在, 還有一星期就出發, 大家掉轉咗, 我的心情變成超興奮期待,holiday mood 爆晒燈!相反我老公開始有不安, 因為平時"哩啡"的我都係佢執我手尾既, 佢見我keep住闊佬懶理咁既樣,正宗皇帝唔急太監急。而當我交帶佢要接手我日常在家處理的事項, 一向對我照顧有加的他, 忽然好感懷地覺得, 原來我在他背後做著好多事, 把我們的家打理得井井有條!哼哼...你估剩係你照顧我呀,放監丫嗱!無我你就"呢咁hea"!人地就老婆幫老公執喼,我呢個"哩啡鬼"緊係由我老公打點一切啦,所以話呢,兩公婆係互相照顧既..hehe

睇下出發前仲可唔可以出多篇先,其實呢排都積咗d post未出, 不過真係忙屎咗, 如果跟住嚟都出唔到, 咁下一篇開始好大機會係我既「低能仔暴走美加」序幕!低處未算低,唔知大家又想唔想知我呢個低能仔響外地發生咩笑話呢?hehe...