膽粗粗,整蛋糕

 

我成日煮餸, 有時整中式糕點, 我會整甜品, 我亦會煲湯, 但咁耐以黎我從來都無整過蛋糕餅乾麵包。響舊post都講過我係唔中意食, 當時大家都好驚訝有人會唔中意食。其實原因係我好怕食一d乾既野, 如果我要食一個包, 可能我要用3杯水去送。但偏偏家中那個人同我相反, 中意食糕包餅多於食飯, 為左呢條友, 我就一於入門學人整, 但麵包對我呢個"烘焙小bb"黎講太高深莫測, 所以都係由bb班開始做起, 就由蛋糕開始。

為左解決乾呢個問題, 我決定蒸。請各位高手指點一下^^老公食過都中意蒸, 其實我唔講佢唔知係蒸出黎呢!我自己都覺得分別不大, 仲無咁乾tim!

第一個 :黑糖肉桂薑蒸蛋糕
買定主要材料先, 唔知呢度可以比我玩幾耐呢?好在平時有煮開野, 其他材料就響屋企就地取材啦!

蛋 -  1隻
低筋麵粉 - 90g
黑糖 -  60g
奶 -  60ML
油 -  1湯匙
玉桂粉 -  1茶匙
薑粉 - 1.5茶匙
泡打粉  - 4g
低筋麵粉 - 100g

做法 :
1.蛋和糖打勻
2.倒入奶和油拌勻
3.最後將粉類篩入拌勻
4.將麵糊倒入模內,最後隔已滾的水蒸12分鐘 

屋企無提子就用左梅乾..哈

 第一次, 好緊張呀!見到佢脹起好感動呀!!

完成, 有d樣衰, 但我們都覺得好味, 好飽呀!老公留左個過兩日先食, 竟然無乾到無縮到!

第二蒸 : 朱古力咖啡合桃蒸蛋糕

有感上次既蛋糕破裂得像異形蛋一樣, 返公司問資深烘焙友同事, 佢話要買個模黎蒸就唔會裂, ok, 又試下先!我base on上次份量自己加減一下唔知會點呢!

蛋 -  1隻
低筋麵粉 - 100g(加10g睇下咩料先)
黑糖 -  50g(上次太甜,所以減10g)
奶 -  60ML
油 -  1湯匙
無糖可可粉 -  2茶匙
咖啡粉 - 1茶匙
泡打粉  - 2g(減左一半, 好似覺得唔洗4g咁多, 純直覺..哈)

好緊張呀又!!等等等!

係喎, 真係唔裂, 真係活到老學到老!!

 

唔知點講, 總之樣衰!好似有d下陷!

食後感 : 老公話好味(此人好詞貧), 我就覺得比上次鬆軟, 一樣係唔乾, 中間有窿窿, 係有d皺皮樣衰..哈哈...而且未去到我想既鬆軟度, 繼續努力!
 
第三蒸 : 蛋白蛋糕

有感如果老公成日食雞蛋唔係太健康,於是就唸住整蛋白蛋糕, 如果成功,以後既蛋糕都會盡量唔落蛋黃。本來唸住去書局買書學, 但真係無咩時間就上網睇台灣網,自己修改為以下既食譜啦!

蛋白 - 4隻
糖 - 70g(係咪覺得好多呢,我睇本身個食譜, 果個人話要同蛋一樣份量, 痴孖根!我個蛋白106g, 要我落咁多糖真係痴鬼線, 所以我減到70g,其實都好鬼甜, 我唔明點解我10次跟台灣網,10次都瀨嘢, 頂!真係要去買書囉!!!究竟咩人可以食到咁甜!!)
麵粉 - 80g
奶 - 30ml
泡打粉 - 兩隻手指夾住咁多(本身就唔落, 但唔放心, 係咁二落少少)

做法 :
分3次下糖打蛋白成勾狀
加入粉類拌勻,再加入奶蒸20分鐘

攪惦!知上次下陷係要倒扣個蛋糕, 又試下先, 係無下陷啦喎 !

真身係極之樣衰!一黎, 我死唔切, 好快就切開黎食, 又切得衰!口感 : 唔鬆軟,好似食緊日式芝士蛋糕!蛋白好香, 但太甜, 不過都好快食晒..哈哈...之後再睇返d資料, 話打蛋白時唔可以有油,水...頂!!!係呀係呀!!!我唔小心整左d水落去呀!!!!SO STUPID!!!因為之前整棉花糖都打過好多次蛋白, 但因為生食都係用蛋白粉, 真正打蛋白係第一次!我要再挑戰!!

總檢討 :
經過3次經驗, 我已經有大約概念!會繼續整, 反正某人中意食, 我又中意整, 都幾好玩!我要勁整儲經驗, 亦要正正經經去買本書, 有所成時, 就會膽粗粗去挑戰麵包...麵包真係難到爆呀!!