【老翻】芝麻南瓜紅豆夾心餅

 我要向全地球既家庭主婦致敬!媽媽真係好偉大呀!!!
話說我呢個part time 家庭主婦因為冬至,聖誕同埋好得閑既關係, 星期日少有地在廚房渡過了一整天, 嘩!膊頭同條腰痛到呢!!!唔明全職家庭主婦耐力點解咁勁!我見媽媽以前都係不停煮煮煮, 真係辛苦晒!我只係煮2人份已經咁痛苦, 好多係煮一大圍枱!!d媽媽真係勁勁勁!!!

之前睇黃淑儀整呢個南瓜餅, 我地都尖晒叫,誓要老翻!不過無抄低d材料同份量, 就自己配啦! 因為妹妹話要整,所以打尖出左post先!自從上次整南瓜+粉呢個動作,死得慘烈之後, 今次我先開好粉然後遂少加入南瓜蓉, 咁就唔驚太濕唔知點算好!因為個個南瓜既大小同多水程度都唔同, 而我既份量係咁既 :

材料 : 
1. 日本橙色南瓜 - 半個
2. 糯米粉 - 1.5杯
3. 麵粉 - 2湯匙
4. 紅豆蓉
5. 芝麻

做法 :

1. 南瓜切件煲軟打/壓成蓉

 2. 粉類篩好備用

3. 逐少加入南瓜蓉, 每次徹底攪拌,唔夠勻先再加

4. 直至變成咁樣, 有少少濕可容易痴上芝麻

5. 先取一舊仔碌成波再按扁

6. 好像查麵包咁查上紅豆蓉, 再合上另一塊

7. 灑上芝麻, 完成第一件!

8. 油暖校細火放入南瓜煎至兩邊金黃即可!

外脆內QQ, 我地兩條友一次過食晒5件, 趁熱食好正正呀!!!