鰻魚洋蔥滑蛋飯

2020第1個post, 講咩好呢?我就唔會講回顧咩咩咩, 回咩回, 過咗去由佢過去啦,唔記得晒喇!至於將來, hhahaa...我係個無plan嘅人,最重要就係現在!

上星期同表姐出嚟行街shopping, 好開心啊, 吹水吹晒d悶氣走, shopping更加能醫百病啦!行去成4個鐘, 腳跛咁滯,吹水吹到好口乾, 平時好少飲汽水, 嗰日一口氣, 係堅一口氣無停咁飲咗支可樂...hahhaah....返到屋企好似精盡人亡咁, 唔行唔知虧成咁, 但好爽! 悶氣全消!!!

見到ding呢個樣, 太可愛,好我見猶憐feel,影完相好似深水炸彈咁撲上床, 因為我張係彈弓床, 佢成個拋起咗, up一輪貓式粗口就當我透明..haha

大家記得阿河嗎?(重溫阿河)

講下食, 話說有一日食日本嘢, 我老公就叫咗個鰻魚滑蛋飯,懶驚為天人咁, 好似全世界得一個人識煮咁, 超,我夠識咯! 唔煮之嘛!見佢好似不能置信咁, 吖頂你吖, 咁簡單嘅餸都要咁不能置信,侮辱我呀?!!等於如果我問我媽識唔識煎荷包蛋,如果佢話識我仲要拍爛手掌話佢叻一樣咁侮辱!hahahha...

材料係咁多啫!
蛋2隻(唔洗打得勁勻),汁料:味淋, 料理酒,鰹魚汁,糖,水(我無份量, 邊試邊溝, total大約220ml), 洋蔥1個, 鰻魚一條(切件)

洋蔥炒到微黃就可倒入汁, 煮至軟

放入鰻魚

倒入蛋, 用筷子打圓圈令蛋漿均勻, 合埋蓋大約煮30秒就攪惦, 不過我煮耐少少, 因為我唔中意食太生嘅蛋。

放上飯面攪惦,超!有幾難ja!

一post一花 :

腦閉塞, 唔知插咩好, 求其買大混雜