天下無不散之筵席

呢幾個月都無咩update個blog, 原因前post都講過, 衰嘢唔想講, 唸都唔想唸, 但要發生始終都要去面對。

我而家做緊嘅公司, 我已經做咗十幾年, 但我已經係屬於年資短, 因為大部份同事已經做咗over20年, 有部份開國功臣做咗接近40年, 佢哋年紀都同我爸爸媽媽差唔多甚至更大!!

我哋呢頭起好左南區鐵路, 但好可惜我公司唔可以見証呢區嘅發展, 因為係屬於夕陽行業, 所以將會響新年前光榮結業...

幾個月前公司老闆女告知道呢個消息,一聽到其實係勁lost,成個心好似掏空咗咁，突然好似無晒方向。但個天對我好不薄，當佢私下講比我知呢一日，我公司大廈當日就大停電，一停就10日，響呢10日唔洗返工嘅日子，就好似幫我預演一次一樣，而響呢10日裡面，我竟然不停咁面對我熟悉嘅，食肆，店舖，買衫嘅網店，公事上嘅partner公司結業消息!!!痴線，約埋㗎!個天好似話比我知, 我唔係唯一要面對嘅人, ok, 就當我阿Q,就係咁我用呢10日就消化咗自己公司結業嘅事實。

咁我仲有一絲希望，因為一日老闆未講，我都想當有彎轉，但自己係做數嗰個，好清楚公司真係無得救，幾年嚟都係老闆硬撐...

到咗11月，老細約我出去食飯，我已知現實始終要面對。響呢個幾月，係我最難受嘅時候，我面對一班如手足嘅同事，我要完全封口，當佢哋問我，做咩今年新年party點解咁耐都未準備(我係永恆嘅攪手)，又或者問我幾時大掃除，我個心就乸到仆街，當佢哋講有關新年後嘅plan時, 我個心真係up到飛起..

最難最難面對嘅一刻終於來臨, 就係有一日放工, 大家去酒樓食飯, 去到食完晒嘅時候, 老闆就宣佈喇, 嘩我真係"鄧"佢難開口, 講完之後佢又喊, 男女同事都喊, 好在我一早知, 而且我盡量將焦點放響D食物上,咁先忍到, 尤其嗰d做咗成40年嘅, 由未婚到結婚生仔,個仔再結婚生仔, 老細都有出席, 佢地有幾sad外人真係好難估計!!><

點都好, 其實由始至終我都無擔心過自己, 其實係唔捨得居多, 因為我地呢行, teamwork最重要, 如果係一個斤斤計較嘅蛋散根本合作唔到, 大家快手快腳完成一單大job嘅感覺好爽, 可能過程辛苦, 但大家都苦中都會吹下水攪下笑。我哋呢度嘅人都係好火爆, 但鬧完一輪第二日又無事, 我響呢度學識咗仗義每多屠狗輩, 咁當然, 我本人都係一條屠狗輩..hahahah..最重要係經過呢幾個月, 我發現我係全世界最口密嘅人..haha

去到last week, 因為我一早買咗機票返外家, 會比大家早兩日走, but!咁新年後仲會返嚟攞稅單嘅..

any肥, 最後一次嘅party亦都順利開心咁完成咗!當係一個happy ending!而我自己亦會留守多幾個月埋尾, 之後嘅事就之後唸, 眼前最重要的事, 當然係我嘅外家之旅啦!yea!