檸檬薏米水

我成日都覺得我條命係生成"去到絕境總有曙光"既命格, 前兩日又一例証!

事緣早排咪掛左個12個鐘頭既黃雨既, 重災仲係我住嗰頭, 仲以為係黑雨添呀!咁黃雨之後第2日當我準備出門口返工時, 我見到風和日麗, 我就唸, d雨應該前一日落晒啦喎, 即係好天啦, 於是我就將遮呀, "是啤"褲同襪都放低晒, 當我一上車時我見個天暗晒, 我仲唸,哦...架車d玻璃係茶色jar...當我發覺d玻璃開始有雨點時, 我仲唸...哦...係d樹有水珠跌落嚟jar...當我見到d雨大到望出街既能見度係「零」既時候, 我除咗響個位度自己shit shit 聲之外, 我唔知做咩...於是我就打算上午請半日假, 然後死唔落車等架車去到總站再返轉頭返屋企..hahahahahaha

就響呢個時候, 我唸起前兩日響小巴執到把遮交左比司機, 雖然係唔同一部車又唔係同一個司機,但其實即係小巴司機位係存起左唔少失遮!!於是即刻裝下, 眼發光呀!!!!司機位側邊真係有兩把封晒塵既陳年舊遮呀!!!!!yea!!!

平時我係唔會惦d我認為好污穢既野, 但呢一刻呢兩把陳遮係何等美麗!!!我用0.1秒選左一把睇落較令人容易接受既陳遮, 用極可憐既眼神問司機可唔可以將把陳遮借比我, 佢立刻話ok唔洗還...之餘,仲碎碎唸咁話咁大雨都唔帶遮......我頭也不回地帶住陳遮踏上癲風怪雨之路!其實我開遮嗰一刻, 有唸過陳遮既遮布會唔因為太耐無打開而骨肉分離?咁我拎住無布既遮骨個樣咪好得意?!但陳遮無令我失望, 佢d皮(布)雖然有d鬆弛,同拗左d, 但佢無分離!hahaha...就係咁雖然我返到公司個頭有d癲, 條褲有d濕, 但起碼好過沖完涼咁款丫!!!




我認我係極無聊之徒,我為左呢件小事心情暢快左一日, 亦為呢件小事寫左長篇大論..hahaha...BTW, 之前覺得d阿毛響車用勾勾住個d野呢個動作係唔會發生響我身上, 因為我覺得唔係幾靚囉...hhahaha...但媽之前送左個貓貓扣比我, 平時當掛飾, 而家可以用黎勾遮, 成件事靚晒又方便呀!!!(雙重標準..haha)





好喇, 真係入到真正既正題啦...hhahahhaa...
夏天我唔多煲老火湯, 通常都係涼茶,滾湯呢d簡單野, 其中檸檬薏米水我出現得密度好高既, 因為岩晒成日水腫既我!上網見到大家都有唔同食譜, 等我又講下我嗰個先!

材料 :
生薏米(右) - 50g
熟薏米(左) - 50g
檸檬 - 1個
水- 4L

左熟右生, 大家都知架啦呵!

洗左要浸30mins, 因為當中可以浸走有害物質xxxx(唔記得, 想知上網搵..haha)

水滾後較細火合上蓋煲40mins, 加冰糖調味, 攤凍。

當去到可放入口既暖度時, 將一個檸檬切片放入。而家d檸檬又平又大個!

等d檸檬出左味就飲得, (我會切之前揸d汁落意米水度先再切)好正呀!!

同場加映 : 有條8婆無la la發神經走埋黎爪到我頭流血, 比我剷到佢扮內疚....

係扮!因為下一秒見我無理佢就行左埋黎近距離反黑我面+飛機耳囉!!!!!好惡呀d8婆貓!