第一麵

呢排起勢咁落雨, 好死煩呀!!!!最死憎立痴痴!又唔想浪費左幾日假期, 於是唸住同老公去附近行下買下咁, 但呢d天氣真係會攪到人無故發爛渣, 加埋我一肚餓就好忟, 我老公話叫我以後熱同餓唔好同佢出街喎, 因為唔想受罪, 我覺得以死港女黎講我已好脾氣,最多都係黑面,fing開佢隻手同埋咩都答唔知...無啦!hahaha.....

唉夏天都係不利我呢d冷氣狗, 都係響屋企蒲好過!之前老公買左個壓麵機, 講真我用左一次咋...hahhaha..講真其實我情願佢送手袋比我,其實我咁耐都想買但又無買部機, 因為我覺得「麵」呢樣野出街要買到無添加唔難, 「麵」亦都唔係d咩貴野,而我既興趣似「3分鐘熱度mode」(再講落去等同自殺) 自己買唔用.最多都係自己暗暗話自己浪費(其實我唔會), 但人地送比你唔用就好似對人唔住咁,雖然佢真係有心又細心(補飛!)...用囉用囉....ok,講夠啦, 如果大家見到我呢個post比人瘋狂洗版, 嗰個人一定係我老公...hahahah

ok, 之前儲起左500g過期粉用來開機用, 真係用得晒喎!好多金屬碎痴左出黎!!

咁開機既同時又可以當練習一下, 其實都幾好玩既!

我最最最錯就係唔應該懶用一張細枱攪囉!!><

ok, 堅整啦, 最簡單既蛋麵,參考咗翠兒食譜,200g低粉, 50g高粉, 1隻蛋, 65g水, 求鬼其分3份

第一麵蒲頭啦!我由厚壓到最薄, 試下最薄既口感

加埋長洲大魚蛋,老公話正喎!好啦好啦我會繼續整既, 唔會辜負你既一番心意!haha...咁我都覺得堅係滑既, 不過下次用返大枱整, 唔會整得咁忟憎啦...(定係鉆板太大?)