照燒粟米煎肉餅

我以前成日都覺得, 香港呢個美食之都, 周圍都係各式餐廳, 基本上選擇比困難多!所以我覺得如果我唔食肉, 其實我都有好多選擇.

點知當我開始唔食肉後就突然發覺, 其實我住呢區係無齋鋪嘅!OKOK,其實我一早知, 只係之前無理佢啦!哈哈..跟住d餐廳總有一兩款素食嘅, 但來來去去都係食嗰幾樣, 堅悶囉!離最近我嘅銅鑼灣有多選擇又好味嘅素餐廳, 其實我可以用外賣程式嘅, 但我又唔想囉...

於是久而久之, 我發現我自己煮足7日咁滯,OK,其實無咩嘢嘅, 純粹想讚下自己勤力jar!haha...

講真我又未去到我媽嗰d境界, 因為我仍然要用植物肉維生..haha

有一日睇電視見到人食burger, 食到個死樣鬼咁好味, 引死人咩! 唓好叻咩,我夠可以整咯!

整得多新豬肉, 我發現有兩樣嘢係唔可能缺, 就係薑同糖!

材料 : 新豬肉1包, 糖, 薑蓉(重手), 鹽,蔬菜粉(可唔用), 燕麥, 粟米

新豬肉真係好鬼lim,所以其實講嚟講去只不過係所有嘢撈勻, 求其分6-7份, 撲鷹粟粉, 煎!

預備照燒汁 ： 
味淋, 料理酒，日本醬油，糖，老抽，水
大約份量係2：2：2：1：0.5：0.5

煎咗兩邊金黃之後, 倒入汁, 閂埋蓋!

反一次索到汁就ok可以上碟, 剩返呢篤精華當然直接淋上啦!

好正啊!個汁係重點!勁好餸飯而且零技巧!如果係食肉嘅都照一樣咁整就ok!
其實係想夾咩都得, 我之前整過一次係加馬碲, 都一樣好味啊!

好喇, 好似好少post dingding咁...哈好懶!
我平時係唔會打dingding, 亦好少鬧佢, 我係完全放任佢做個幸福嘅死港女嘅!haha..
所以當佢有嘢唔中意時絕對會咬人嘅,唔多,但會!
有日好地地molala咬我一啖,佢亦知衰, 但唔代表唔黑面, 指一下, 真係指佢一下就黑!即刻整個邪靈眼比我嘆!haha..

可能佢悶啦, 於是同佢玩下等佢放下電, 玩都玩得懶過人, 瞓響到玩..haha

一post一花 :

有一日起身, 突然好想屋企放一盤黃色嘅花, 本來唸住去到花舖每樣黃花都買d,點知樣樣都唔係好新鮮!但比我昅到有包未開嘅跳舞蘭, 嗱嗱聲叫老闆開嚟見我!哇好新鮮!即買!