西芹腰果炒帶子

有時，周遭環境會令人好洩氣，令人好扯火，令人好沮喪，最仆街嘅係就算你有咩感受，除咗自我乾煎，其實做乜春都無用。

但人最緊要就係positive，我會完全抽離現實，做一d好費精神嘅嘢，盡量響第二d 地方消耗心神，例如砌我嘅麻煩積木，每砌一粒都要另外上螺絲，上螺絲呢個動作絕對乏味煩厭，但真係令我逃避咗現實一整個下午...

Ding姐一路都虎視眈眈, 佢醉翁之意只在膠袋, 膠袋係佢一生最中意嘅「食物」!

仲想厘埋伸隻手出嚟勾走個膠袋!!古惑得佢吖!!

所以我屋企收得最密唔係錢, 係膠袋!!

好啦, 比我軟硬兼施完, 明知無可能成功就去咗瞓啦!!仲瞓到溶入家中咁款, 但其實係煙幕嚟!!!

見呢排咁乾, 煲咗個桃膠雪耳煲牛奶, 入廚房睇睇火....

我發誓行開咗10秒都無, 聽到個廳有異聲,擰過去....仆你個乖!!!唔係瞓緊咩?!?!你食膠袋就食膠袋, 唔洗咁毒好倒唔倒,倒全SET最細粒包螺絲?!?!?!WTF!!!!仲要係兩隻顏色一齊倒?!?!呢排明明一日比你食足5餐?!?!

唉....仲有少少，留返下次逃避現實再砌埋佢 😘

仲要雙手奉獻零食比兇手, 唉....好卑微啊!

之後入廚房，慢慢洗洗切切煲個湯，再去整個平時嫌麻煩嘅餸。

平時返工，唔會浪費時間做太多洗切嘢，但當你想逃避時，間屋靜靜咁，慢慢做好手上工作，反而唔覺煩。

用刨刨到西芹一條筋都唔剩

用100℃焗香腰果

帶子洗好索乾用少少蒜鹽醃下

先煎香帶子備用，原鑊用蒜蓉蓉兜炒香西芹，加酒，糖，鹽/蔬菜粉加蓋焗一焗，帶子腰果回鑊兜勻食得。