我地呢d山高皇帝遠, 習慣自由自在嘅人, 實在自由得太耐鬆懈咗!!太大意喇!山高皇帝遠邊個係皇帝呢?梗係我阿媽啦!!!
我相信好多人都係驚阿媽多過驚阿爸, 我阿爸又心軟又無所謂,最緊要佢唔太中意講嘢,所以衰d嗰句, 我地由細到大都恰佢..hahaha
我阿媽, 都係典型好阿媽,即刻照顧到屋企井井有條, 餵到個個都變豬, 但發起火嚟非同少可, 尤其我呢d又反叛又中意做衰嘢又把口串77咁, 細個成日比阿媽打到衝上雲霄...haha..
但而家佢老咗又收晒火, 加埋我又高大過佢, 佢無可能同我隻揪啦當然, 但佢而家仲勁, 佢係會用哀怨聲對我喃嘸!在我嚟講寧願比佢打, 因為我個人太怕煩, 好怕人重複講嘢, 我阿媽好鬼聰明, 每個女有唔同弱點, 佢就專攻唔同弱點去治我地...hahaa
咁我做咗咩衰嘢?因為我地呢d住得咁遠習慣報喜不報憂,粉飾太平, 費事煩, 所以我仆街係無同阿媽講, 我之前都講, 因為我幾年前仆過一次大街, 傷到我老公以為我比車撞, 正宗仆我個臭街,所以對我d屋企人嚟講, 我仆街係一件好可怕嘅大件事,我係應該稟報比阿媽知嘅,哈哈
但, 我竟然赤裸裸咁公開咗響個blog度, 太大意了!!我唔記得我媽有時會睇我blog!希望佢掛住湊孫忘記我嘅存在啦!(其實佢而家已經眼中只有孫s)p.s.: 媽, 如果你睇到, 我無事!仲跑得快到可以參加奧運!!!
hahaha..大家祝福我, 希望我媽唔會對我使出喃嘸功啦下!
講返食, 呢個係早前仆街前煮嘅,本來我想整魚香茄子煲。
點解本來, 因為我無加咸魚。
一來,屋企唔會長駐咸魚..haha...
二來,一係唔買, 買就要買靚, 我知道去邊度買靚咸魚, 但我一路都無時間去買。
三來, 我記得盤古初開魚香茄子煲係堅無咸魚, 佢個名就係因為無咸魚都要整到有咸魚味咁。
於是我就試下喇, 咁順手可以消滅一包新豬肉存貨!
話時話, d新豬肉開出嚟一餅
呢個餅狀係唔會因為你將佢倒出嚟就算攪佢而乖乖變做肉碎狀
一定耍加液體攪先可以變碎嬸嬸, 咁我就順手醃醃佢, 所以我就用酒攪, 跟住加糖,豉油簡單醃一陣,個樣假得嚟都幾真..haha
薑蔥蒜就係必備啦
當日剛order咗有機菜, 有d細細茄子, 比平時嗰d濃味好多, 我之前係唔食茄子的..haha...咁我會煎煎佢先!
爆薑蔥蒜, 加埋舊腐乳一齊兜, 跟住加新豬肉, 兜混, 再加茄子兜, 最後調味料(豆辦醬, 蠔油,糖, 豉油(少), 蔬菜粉, 酒, 水),大約一半份量唔好過面, 炆煮至開始收汁食得!
嗱, 係好味又惹味嘅, 但佢絕對唔似亦唔係魚香茄子煲..hahhaha...傳說唔落咸魚都有咸魚味係點呢?hahaa...魚露有無咁大power呢?事鬼但啦唔唸喇, 反正都好好餸飯!好佛系求其...hahha..
我每次煮魚香茄子都會加鹹魚呢,如果冇加鹹魚,袁生會殺左我架
回覆刪除你點整佢都會同係食晒架啦..haha
刪除我都試過用腐乳煮茄子,唔錯架。
回覆刪除腐乳用嚟吊味我還ok, 因為我唔太食腐乳
刪除我會用腐乳蒸茄子
回覆刪除腐乳用嚟吊味我還ok, 因為我唔太食腐乳
刪除父母關心仔女係啱架,我哋永遠係佢哋的BB。老DAD未來英國時我都係報喜不報憂。依家反而可以好坦白,咩都講。
回覆刪除其實我地屋企都係咩都講, 不過有時大家咁遠佢地唔知頭唔知路費事佢地擔心,因為通常佢地都會加d幻想情節落去
刪除D相顏色怪怪地🙄
回覆刪除我都想試腐乳茄子,我知妳唔食腐乳,少少哋我試吓喇🤪🤪🤪
我唔食唔會整喎, 你一啖茄子再啪磚腐乳響個口混合啦..hhahah
刪除魚香茄子煲,顏色好靚!
回覆刪除程兄好耐無見!你好嘛?!
刪除其實我嘅魚香茄子永遠都無魚香,唔特別中意鹹魚味XDDD
回覆刪除hahah..其實我都同你差唔多!比較少食呢d醃製嘢,但細個時勁愛!
刪除唔該俾三碗白飯我!大大碗!裝滿佢!🤤
回覆刪除