AIB(長文)

本來，本來呀，我係post食嘢嘅。
咁我通常講食之前都講下自己嘢先嘅，點知打下打下，打到長過水蛇春，咁就事鬼但當一篇，因為睇完晒你哋都未必想再睇食，因為唔開胃...hahaha

咁上篇我咪話已經settle down晒d 嘢嘅，唸住呢排可以休息下印印腳做癱妃，但你哋熟我嘅，都知我天生好命，衰到貼底嘅事永遠唔關我事，但就成日都會遇到好多萬中無一嘅低能騎呢意外, 個天真係好中意同我玩遊戲, SO SO funny!

以下我講嘅嘢都無咩相嘅, 大家只可以靠我嘅文字去幻想, 因為過程太突然, 太危急喇!hahah..

話說, 有一日星期5放工返到屋企, 心情大靚買咗一大堆零食唸住weekend響屋企開返個junk food party, 拎入廚房沉醉於偷食中, 覺得有d「嗡嗡」聲, 頂!!!有蜜蜂呀!!><咩都唔洗講, 即刻將dingding掟入房閂埋門再搏鬥, 好心如我爬上灶頭開個窗比佢, 好彩佢走都走唔切飛走咗!但問題係, 大家都知我係冷氣狗, 呢排熱到咁, 我敢講我從來無開過窗, 所以我估佢係由抽油煙機銀色條管入嚟囉...唉

第2日, 平安渡過。

第3日, 見到窗外條管口有兩隻蜜蜂, 嘩嗱嗱聲開著個機等佢入唔到嚟啦!

第4日, 老公起身見到有隻響廳, 拍死咗。
響呢一刻開始, 我覺得d蜜蜂係有思考, 有記憶, 甚至係有人工智能, 以下我會統稱佢地為AIB=「A.I.BEE」。
我開始上網睇下咩料, 我得出幾個結論:

• 原來蜜蜂要搵新竇, 係會先派幾隻先頭部隊去探路。
• 原來呢如果蜜蜂入屋你比佢安全離開, 佢會覺得你屋企好安全, 會舉家移民過嚟。
• 原來如果蜜蜂入屋你令佢受傷離開, 佢係會吹雞返嚟覆桌。
• 原來如果蜜蜂入屋你打死佢, 咁佢嘅族群見唔到佢返嚟, 就會知道呢度危險, 唔會移民過嚟。
• 風水佬話蜜蜂入屋即係有大喜事喎。=.='

第5日, 我臨返工時, 頂佢趕頭趕命又見到廚房有AIB, OK, 我當你係嚟搵返你老友, 雖然我真心唔想打死佢, 但佢唔死但全家嚟我咪仆晒街!OK, 打死咗。事件完了(以為)。

但都係驚驚地, 叫老公攞個洗衣網袋笠住屋外個銀色管口, 等D AIB入唔到嚟。果然, 見到有隻AIB返屋企咁嘅姿勢入嚟, 發現入唔到響到撞玻璃, 好憤怒, 我完全感受到佢嘅怒火，WTF! 究竟條銀嘢裡面有咩咁吸引, 定係屋企有咩大喜事令佢地排住隊嚟恭喜我?!

第6,7,8日都無事發生。

我要強調dingding係貓界嘅豬兜, 有咁多次AIB入屋佢比我掟入房嘅過程, 佢都係茫茫然唔知發生咩事,連吶喊激勵我都無, 所以我只好靠自己。

第9日, 我老公唔響屋企, 得我同貓界豬兜響屋企, 本以為可以安安靜靜癱屍一整天, 點知OMG!!!AIB AGAIN!!!仲係大隻過之前, 係有一隻手指尾咁大隻!!!!雖則我響新界大, 雖則我唔怕昆蟲, 但,但,但....我今次係堅堅堅驚!!呢隻係堅有針囉><!!!我打比老公發出絕命哀號, 但呢一刻只有我自己先救到我自己!!佢係報仇BEE!!!佢極頑強,佢打極都唔死不突止, 佢仲下下向我塊臉衝, 有一刻佢係爬咗我心口兩步, 我唸隔離屋只係聽到我奪命狂呼.......最後, 我當然勝利, 但我真心覺得我好仆街殘忍, 我真心對AIB係respect嘅，因為佢真係明知輸都要去挑機人類…

因為呢一嘢, 響外邊個入口已經封咗嘅情形下仍然有AIB,我都幾sure響條銀管入面已經有竇同埋有AIB住左響入面啦, 我唸係響我搬入嚟之前裝修嗰一個月無開過抽油煙機而比佢地搬咗入嚟, 事叉但啦, 總之就搬咗入嚟啦, 即晚, 我叫我老公用封箱膠紙將個扇葉個網都封埋, 即係話成個銀管係無入無出喇!跟住就call c fu, 將成條嘢換咗佢, 但好衰唔衰, 又遇著打風落雨, 唔做得嘢住, 唉是但啦, 最多咪無抽油煙機用, 呢件事都叫告一段落。

後記 :

封咗管兩日, 我老公話要篤d窿用抽油煙機喎, 我係咁叫佢唔好, 因為我覺得愈細嘅小動物佢地嘅求生本能係愈勁,佢係咁話唔會有囉死晒啦,鬧交咁滯, 於是我去咗廁所冷靜一下, 但唸唸下衝出去睇下佢篤成點, 仆佢個街, 篤得好大!條友篤完又死開出咗廳, 我離遠望多兩望唔對路, 行埋d睇下, wtf!!!!!真正嘅大佬!!!!我相信係THE QUEEN OF AIB!!!!嘩頂頂頂!!!真係好很大隻!!!佢企咗響個扇葉個罩度想出嚟囉!!!!!佢一定係比條蛋散篤嗰D窿入咗D新鮮空氣吸引咗嚟囉!!!!所以我永遠都話信自己好過信男人囉!!!當然我即刻又奪命狂呼叫條蛋散封返好佢啦!點知轉頭聽到開機聲, 我問佢做乜春, 佢話要FING返佢上去囉, 都係嗰句, 男人你算吧啦, 低能!一陣FING到D內臟周圍係, 仲有!!佢始終響條管度都會死, 無必要做埋D賤嘢令佢死得咁慘, 好仆街囉!唉..但THE QUEEN係令人敬佩嘅，響我stop條蛋散前，佢死爪住，無事喎!堅!

後後記 :
因為打風落雨關係, C FU 未嚟得換嘢住, 但我完全好大陰影囉, 有條毛掃過我都以為有AIB, 希望呢件事可以快快完結就好喇><

可能你會話，點解唔call愚弄署，如果佢係突然一群咁出現，我會嘅，咁而家都係小兒科啦，自己攪掂咪咁誇張啦！

可能你又會問，其實我平時係咪真係咁驚蜜蜂呢，死開我真係無咁虧，但響自己屋企室內見到係別有一番風味囉，而且響街見到，你係唔會挑機去殺佢嘛，而且殺佢好迫於無奈，因為佢哋係益蟲，我仆街在唔可以令佢一刀痛快了結！唉..

你亦可能問，點解我唔閂咗廚房門，唔洗攪咁多嘢，唉，我都想，但我廚房無係無門㗎囉！唉…