我媽的腐皮卷

我相信大部份做囡都覺得自己阿媽係全世界煮嘢食最好味嘅人。(囝唔得呀, 要話老婆先係!hahaha..)就算阿媽煮得唔叻, 總有一兩樣餸令自己有情意結!

記得好多年前, 當時我舉家已經移咗民都成6,7年, 有一日我煲青紅蘿蔔湯, 屎坑撞棍咁, 竟然煲出咗阿媽煲嗰種味道, 飲頭幾啖時, 不自覺成對眼都翻滾住眼淚!突然百搬滋味在心頭! 我唸嗰次都係人生最爆嘅一次!邊喊邊飲湯,人地睇落去好似飲緊毒藥咁..haha

不過我阿媽食咗素之後, 以前我地細個好多餸佢都唔記得點整喇, 不過呢幾年我自己都無咩食肉, 所以佢記唔記得都無所謂lu!而家取而代之係媽的味道2.0。因為阿媽而家煮嘅素都好好味, 佢會自制d素漢堡,素丸之類好鬼有唸頭, 所以對我嚟講阿媽仍然係全世界煮嘢最勁嘅!(擦鞋!因為佢會睇我個blog..hahaha)

好喇, 今次要講既腐皮卷有咩特別呢?其實我唔知係咪特別, 可能我係豬先咁覺得啦!haha..anyway, 都sahre比大家!話說我每次整腐皮卷不論係煎定炆都會un, 都唔似酒樓嘅!咁我又去問下阿媽, 佢有計喎!原來只係多一個步驟ja!

材料 :(唔多款, 但我覺得已足夠!)
木耳, 甘荀, 沙葛, 豆包

豆包其實係有好多層腐皮疊出嚟嘅嘢

全世界切絲

加調味炒,待用 (我係錯的, 我媽話豆包不用炒, 係切好, 直接響包時先放入, 咁個樣會完整d靚d, 唔會好似我咁炒到散晒=.=")

鮮腐皮用濕布抹好再米形剪開8份(喂呀, 好嬲呀, d鮮腐皮我買咗兩日咋!!發晒毛!次次都係咁!我已經放響雪櫃放肉類特別凍嗰格, 放冰箱又脆晒, 大家點保存呢?呢塊我係即刻死落街買過既!)

包喇喂!(阿媽就話唔好咁多餡嘅, 不過唔唔唔..)

包好!(樣衰加唔平均已經成為我嘅style喇!唔唔唔..)

好喇好喇!究竟點樣令佢唔un呢?就係當你包好後, 不論你想煎定炆, 首先就係蒸咗先。我媽就不用碟, 只墊牛油紙,用蒸爐, 蒸20分鐘。我用鑊,用碟隔水蒸, 就蒸30分鐘。記得個底用牛油紙, 驚痴碟(應該係)。同埋腐皮卷互相之間要有距離, 如果唔係都會痴(好明顯我癩咗嘢...)。蒸完直接煎就攪惦lu!

係一d都唔un, 煎完好脆, 凍咗都脆!呢個方法work, 不過我嘅技術係..唔唔唔..