素水餃

唔知大家平時買野食興唔興睇後面d成份標籤?我呢幾年都開始有留意, 因為始終唔係18,22, 唔想食咁多垃圾落肚。當然!! 對於有d你對佢欲罷不能既食物, 你明知成份有屎你都會食嗰d, 就唔會睇喇!眼不見為乾淨!

有日好想好想好想食餃子, 嗰種想係一睜開眼就要食嗰種, 好辛苦捱到放工去買啦, 咁我樓下間超市得兩款素餃, 嘩頂, 唔望由至可, 本來有幾款添加劑係無可口非, 但佢仲多過原材料!!比肉餃更多!咁究竟我買肉餃好, 定買充滿添加劑既素餃好呢?挑!最憎比人限死晒!唔食囉!!哼哼!

但我想食餃子既心係未死既, 之前阿媽返黎整既素餃好好食, 一於問佢攞食譜做copy cat!星期六拉埋老公落水, 齊齊包餃!

材料 :
小棠菜~1斤,豆卜, 炸菜,素火腿, 蛋(1隻炒蛋)

調味 :
蔬菜粉,糖,蛋(1隻生蛋),少許生粉水, 1條(包)燕麥糠

豆卜有好多油, 所以先出水, 凍左後渣乾水

炸菜都要用滾水洗一洗表面醃料。

全部材料渣乾水切碎, ok,除左菜之外, 我全部係用機攪既..haha..(左起 : 素火腿, 炸菜,豆卜), 我阿媽上次係全人手剁, 但佢出黎既效果係同我機攪一樣, 所以話呢,d阿媽真係勁得好變態!!

而菜唔可以用機攪既原因係因為會攪爛晒佢d纖維, 會變左菜蓉。把菜先輕焯, 攡凍。最重要既一part係要揸到佢乾晒!!我呢對廢人之手梗係收皮啦, 又係老公show off既時候喇!hehe..

就係咁, 一斤菜, 焯完縮左個碼, 比我老公當仇人咁揸完後, 剩返一篤仔!!!hahaha...跟住就切/剪碎佢啦!

將所有碎材料同調味料混合好

好!開好壇, 埋位作法!

大家中意邊種包法?我覺得左邊好d, 因為多d餡

兩條友, 包包包, 笑笑笑, 鬧鬧鬧, 咁就包好4x隻喇, 左邊係老公包, 右邊係我既,如果無比較既話, 我老公都包得幾好既!hehe...

好死飽呀變態仔!!!勁滿足!!!

心得 :

1. 餃子材料不嬲係hea爆可以任意配搭, 但我覺得炒蛋同豆卜係must item, 炒蛋係食唔出味, 但會令整體香好多; 豆卜同粉絲既功能一樣, 係索汁索味, 同粉絲分別係多左d口感同多左豆香, 我阿媽話既。

2. 都係我阿媽話既, 扭乾d菜如果用魚袋裝住黎扭會得心應手多d!

3. 餃子包完放入冰箱10分鐘先煮, 會無咁易爆, 仲會食落實淨d, 避免食落有泡水! 

4. 每樣材料既質感都唔一樣, 所以要攪爛既時間都唔一樣, 唔好一次過倒晒落去攪!