30分鐘煲冬瓜

唔怪得知d人話裝修係煩死人, 我屋企唔係裝修, 只係一d維修工程, 但都好擾人囉!!><, 最慘有d唔係一次性, 可能做完唔work又要翻手做, 中間又要一輪爭拗咁, 影響晒心情!!我呢d性格,有一日如果要裝修既話, 一係會癲一係會有血案囉!hahaha...

今年既夏天好似比以前熱, 勁辛苦, 放假都係等太陽落山先出街。雖然我用電磁爐無咁熱, 但都好唔想煮飯囉!!唔煮飯ja, 湯水涼茶就唔少得既。有日行過街市見到有大冬瓜, 簡簡單單滾個湯消下暑先!

材料: 
冬瓜-1斤
咸蛋 -1隻
大頭菜 -1片

阿姐話呢種個面有白粉既冬瓜先係真．冬．瓜!佢講緊時既眼神就好似話比我知有手瓜先係真．漢．子一樣...hhahaa

呢位真漢子雖然樣衰, 但千祈唔好掉左d皮,阿媽話佢就係消暑既靈魂! 用百潔布省省佢就靚仔晒架喇!

我成日都唔記得大頭菜叫大頭菜, 次次都要阿姐猜迷語, 今次早一日打定電話問阿媽先, 一打去都係叫阿媽猜迷語: 一塊3角形又咸又黃既叫咩名?阿媽一嘢就估中!好彩3角形又咸又黃佢無估底褲ja...hehehe(低級趣味!)

水滾先放冬瓜皮同大頭菜先, 滾20分鐘

20分鐘後再放冬瓜粒滾多15分鐘最後5分鐘放埋隻咸蛋入去, 鹽都唔洗落!

我有時會加埋d元貝仔或者蝦乾, 但今次唔記得左, 但都好夠味好好飲, 最緊要係快!!