南瓜日式海鮮飯

真係極極極憎呢排天氣!!

有太陽時, 就熱到好似要煎咗層皮咁!好喇落雨時又無風,潮濕翳焗到死!

我呢d天生捲毛狗, 平時洗完頭捲到呢, 一定要吹到直一直, 都可以呃得下人,但只要一濕水呢就會變返爆炸狗, 有時唔需要真係惦到水, 只要係潮濕, 個頭就會慢慢變曲, 好似傻婆咁..haha..

你一定會話, 咁你又唔去電直佢!我又唔中意喎, 我唔中意做一d長遠性嘅嘢, 即係即使我日日都要畫眉但我都唔會去繡眉咁囉!

以前住舊屋返工通常一係地鐵一係的士, 但而家就屋企樓下就係巴士站, 反而搭的士仲行得遠, 都幾方便嘅,除左...

我上嗰架車勁多老人家搭, 係非常老嗰種。佢地可能只係搭一個站掟個彎就落車,我除左頭幾日外, 我而家已經放棄左, 放棄咩?就係放棄hea住上車。我發現不論我點跟隊, d老人家都會完全地唔知響邊到走出嚟插隊,做咩Jar!其實佢地插唔插都一定一定有位, 因為通常都係吉車囉, 我明白有d老人家好心急...唉..whatever!但呢排落雨,插隊,OK!行得慢,OK!向我身閂遮,OK!我抱埋你上車都OK, 但唔好要我踏緊上巴士嗰一刻先監粗插隊, 我完完全全地洗頭式企響到淋雨, 全日忍受自己爆炸狗咁樣開工...所以我而家咩都唔理, 死攬住前面嗰個(唔係真攬呀!hah), 唔比佢地有位插入嚟,快手快腳上車, 然後直標上樓上, 等佢地後面慢慢行大家唔洗煩。

呢d咁嘅天氣, 要煮都係簡簡單單一煲過就算, 日式咖哩通常係我頭幾位選擇, 快靚正!

整日式咖哩主打食個汁jar!我就唔會買靚海鮮, 一包雜海鮮洗洗佢, 用少少黑椒同蒜鹽兜兜佢放埋一邊先!

我中意用呢個牌子雜海鮮, 我見過有其他牌子個樣好垃圾(haha), d蝦可以細過手指甲..haha..

炒洋蔥先啦, 我平時呢就一定勁好心機用慢火慢慢炒到d洋蔥焦化嘅, 咁先好味嘛, 但呢一刻我無抽油煙機用囉(睇上篇), 頂煙到我眼盲!熄火!就咁算!haha

我有一次因為清雪櫃, 所以落咗d南瓜落日式咖哩度, 完全溶晒, 嘩頂成煲咖哩香,甜,濃,都提升晒!之後, 無南瓜我寧願唔整住, 好重要!
咁將d薯仔呀甘荀呀切細粒粒炒下咁,南瓜切大切事鬼但, 反正都會溶晒!兜完加水慢火煲下

等d南瓜溶就可以加咖哩磚, 我試過好多種, 我本人最中意食呢隻牌子

我係無辣不歡, 日式咖哩都係主打甜, 但呢隻盡咗力去到5, 我老公就話堅辣到佢飛起, 我就覺得OK，我屋企煮嘢嘅準則，係跟煮嗰個嘅口味...hahaha

咖哩磚都溶埋就可以加埋D雜海鮮落去, 食得!

我事頭婆去旅行買左包風乾蔬菜比我

佢後面話加落咖哩食正正喎

OK wor真係!!heehee...開飯^^大大舊飯就梗 ga la!