去美國發癲 - 雜不甩篇(下)

呢排真係好鬼忙, 忙住懶!hahaha..用左太多時間去懶咩都無做過...hhaha...返咗香港成個幾月仲未打晒美國篇, 好喇, 所有放晒響呢個post完鬼咗佢先!嗱, 真係好死長架下!

話說, 情人節時我仲響美國, 咁我梗係一早有準備啦!因為我好擔心我老公係一隻豬, 所以我響情人節前兩日已經send咗呢張相比佢, 比佢用兩日時間唸下d嘢放左響邊。

send完比佢我就去訓, 大約6個鐘頭後起身見到原來hill cheung友一早已經send咗呢張相比我, 美其名係比我睇佢食緊咩, 實際係放後面張卡出黎示威表示佢而經解拆到張相!

哼哼!你搵到卡jar, 仲有禮物呀!於是我又send呢張我認為係打大佬級數既相比佢估份禮物放邊。(因為我家dingding識得開所有既櫃桶,門, 所以我屋企周圍都係呢種扣)點知我一send比佢, 佢就即刻問我, 做咩影床櫃桶???食屎食屎食屎!!!點解一睇就知???!!!

係咩禮物呢?其實係仇人禮物, 一嚟我老公中意砌模型, 二嚟我唔響度困佢響屋企砌砌砌等佢無得出街..hehehe(奸笑中), 而佢只係砌左一盒, 其他仲未砌, 因為當女皇返到香港, 佢所有時間都要用嚟服侍我, 仲邊有時間砌!hahahaha...

好喇, 又繼續講返美國先。

我今次真係好死好彩, 不但經歷咗紐約20年最凍果日, 而且仲比我見到雪雨。我媽話住咗咁多年都無見過。而且時間仲只係一瞬間, 當我地響姑姐屋企打完邊爐發緊呆時, 大家突然企直晒狗衝左出去, 嘩原來雪雨係好似一條條繩咁快速跌落黎, 唔洗兩分鐘眼見所有樹呀,車呀, 地呀已舖上厚厚又超軟棉棉既新鮮雪, 跟住揸左幾分鐘車就變成雨lu!我真係好lucky!!

好喇, 講下買野先!有一日我發覺我媽把罐頭刀勁好用, 雖然佢話已經係十幾年前買, 但我都影低睇下買唔買到, 於是叫老豆車我去買家庭用品既店搵下啦!所以我話, 男人同shopping係勢不兩立既, 好似我老公咁, 每一次叫佢買野都一定一定買錯, 今次我叫老豆車我去買ja, 佢竟然...竟然...車左我去一間買建屋裝修材料店!!

周圍都係大唧車+建築界巨人, 巨人係因為大家都好鬼恐武有力, 連我呢個咁大份既人都變左哈比人咁。同埋全場得我一條女囉!好死格格不入!

而重點係即使呢度真係有罐頭刀買, 我都覺得會好似響沙灘搵條毛咁難囉...雖然我老豆好努力咁搵, 但我都要同佢講算吧啦, 我覺得我響度好很怪呀!是的, 圖中正是好努力搜索罐頭刀既老豆...hehe

而最後既結局係響一間家庭用品店搵到!仲係100%一樣!就係呢把喇!好lucky呀!

繼續講買野先!我唔算買左極多嘢, 起碼有理性既..haha.但我都係爆喼返。最重既係因為我d皮膚勁乾, 所以我一向都係要用美國出既neutrogena, 呢隻響香港唔係好覺有得買, 就算有都唔會夠美國既潤, 平時阿媽寄比我或者搵人拎比我,我今次掃幾十支, 幾死重!!

我細妹響加拿大過黎, 我叫佢買支上次試過既楓樹糖漿比我, 嘩!!佢買左支大10倍比我!佢咁死愛我就算幾爆喼我都要攞走, 右邊係上次用完嗰支, 好大對比!

底底篇..hahhahah...我話左我無聊連底都影!但講真, 我堅係吼住gap既底底, 因為又靚質地又好又唔貴, 本來忍住只買5條, 點知去第2間又見到唔同款又買5條, 講真我覺得唔多囉, 因為買底褲不嬲都係我飛佛啦, 再買多3條比老公益下佢啦..hehe

大家都知我係好嚴重間條控, 打開衣櫃已經9成間條好難襯, 叫左自己stop, 頂去買底褲時見到間條袋, 雖然覺得唔係太抵買,但我怕我唔買會好辛苦..hahah... 所以又買左..hehe

又係成日叫自己唔好太低能, 但我真係好中意貓頭鷹喎....ok, 其實人地係掛響車, 但掛袋都好靚吖!hehe..

點解我話唔準自己再買間條嘢?比個事例子大家睇, 有一日行行下街見到塊鏡倒影,頂喂呀好樣衰!太間條!攪到成日勁不安!!最慘我真係好中意灰色又好中意間條, 所以灰色同間條係成日撞....呢個係當日既衫同袋...

今次因為真係over 50lbs x 2喼,+35lbs hand carry + over20lbs backpack 既關係, 所以手信都要以輕為主!本來買比大圍同事share既朱古力都要拎返d出黎!
但有d人一定要買嘢, 其中有d真係好抵抵抵!!!!!

買比表姐既香水!!好靚!us$12咋!!!!!!仲要係最後一盒!!!

LC 既pie bird!買比我放假佢幫我頂埋我d工作個同事!之前自己都一路想買!點知響outlet見到us$11!!!!雖然無我最想買既黑身黃咀, 但咁抵唔係唔買呀??!!

我老公見親我買手袋同鞋都會皺眉, 因為太太太多, 但見到靚手袋唔買我驚我會好辛苦(好容易辛苦!)...hahhaha...

同場加映, 唔關美國事...講開我老公嫌我成日買手袋同鞋, 嗱, 今年佢送比我其中一份生日禮物又係鞋呀!所以話死港女是這樣鍊成的!唔關我事架!hahhaha....

上次我主打買嘢比老公, sorry,今次主打買比自己!hahha..不過咁, 身為我個trip最大投資者, 我都會買嘢回饋下佢既!hahaha..

有一日同媽and妹行街, 比我發現新大陸, 點解咁講, 因為個mall佢地行左千萬次都無入過既舖頭, 點解呢?因為係一間黑人style既舖頭, 裡面店員人客清一色黑人, 但我本身對黑人文化有偏愛, 即狗衝入去啦!!嘩!!好很平呀!!係咪打錯價錢呀!!!呢件褸us$7!!!!!裡面係毛絨,袖裡係夾棉!!我老公話凍天剩著佢揸電單車都頂得到!!$7!!!好癲!!

因為我老公好死高大(嗱!我唔係讚佢呀, 我係話佢難買衫咋!haha..), 呢度d衫大件得黎又型又抵,但真係唔可以再買咁多, 因為全部都好死大件又厚, 無位喇!!最後響同一間店都仲有買左多幾件比佢就算, 頂質地都好好, 都係us$10樓下!!

都係果句, 佢隻14號死大腳響香港唔太多選擇, 循例都要去買對鞋比佢!

拖鞋都有..hahha...但佢寫12號, 唔明仲大過14號!總之夠大啦!

有一次見到大妹用既酒精搓手液好香, 跟住見到間舖原來好多款揀, 又香又靚, 最緊要夠輕又實用, 大量入貨用黎做手信一流!!

最後好彩我不惜用晒自己全年既大假過黎, 好彩因為時間夠多(當然我希望再多d), 可以唔洗趕頭趕命,仲可以同爸媽去行下晨運。但唔嘢少架, 耍圍住呢個大湖行, 連跑帶滾都要行都要成40分鐘。

雖然我有唸過 : 痴孖筋, 洗唔洗咁毅行!!

但, 環境靚都行得好舒服!而且, 我比一般人要見父母既機會係較難同少見, 所以我經常remind自己,每一次有機會可以做好女呢個角色都要盡量去做好!盡量唔好去做仆街女!有d機會唔係成日有, 時間亦唔會停落黎去等你有mood到先繼續飛逝...

對我黎講, 香港雖然係我出身既地方, 但已變質既香港, 係無嘢值得我留戀, 我只知仲有一人一貓一龜在等我, 而我亦要繼續留響呢個我最熟悉既地方為將來拼搏。

但美國對我黎講, 除左我既家人之外, 呢個地方, 可能無咩好迫既感覺, 起碼行10分鐘可能都見唔到一個人既關係, 好岩我呢d勁憎social既死港女, 我可以著到乞兒無眉素顏咁出去, 香港我真係無勇氣, 而且地方大好free,所以我真係掛住美國既日與夜...

我亦掛住呢個可以比我一個人發呆既後園, 我自己一個響呢處都消磨左唔少時間。
雖然係唔捨得走架喇,但我知道, 今次既完結係比我期待下一次既來臨。倒數中既下一個農曆新年, 仲有9個月就到!!!呵呵!

~2016《去美國發癲》完晒~