有益好味 - 糖薑

唉唉唉唉唉....難得要返工嘅大喜日子, 係無錯,係大喜, 因為而家一星期返2-3日同同事輪住返工, 所以而家覺得以前可以返工, 同同事有講有笑嘅日子,做嘢好忙嘅日子係多美好!!!

咁唉咩呢...唉...我返工拎口罩時跌咗個口罩落地下!!! 嗰個係換鞋位, 就算消毒咗我都無勇氣用, 心如刀割, 跌錢都無咁傷心!!!口罩啊!!!

呢排醫護都勸大家留在家,盡量不要外出, 不要gathering!我好聽話啊!home office嘅日子, 我100%唔出街, 其實唔出街都好多嘢做,做完公司嘢,又要好勤力咁做清潔, 跟住仲要日日煮....我真係好懷念做OL嘅日子, 我唔想做家庭主婦好辛苦啊!!希望疫情快快遠離我地啦!!!

聽長輩講,早上食薑好處多!養生喎!本來唸住整薑糖, 但整過好多次有D悶, 反正有時間所以決定挑戰一下糖薑喇!!

材料只有兩樣, 水都無, 就只有2磅薑,1磅糖
(我用中坑薑....hahhaha...唔知咩名, 總之界乎子薑同老薑中間)

剛要order有機菜, 順手order咗d有機薑!好開皮!
呢個係我響無印買專洗擦蔬果嘅鮑魚刷,好乾淨, 罅隙都刷乾淨!

切片, 大約3,4mm厚, 切咗出嚟嘅掟唔好side

入保鮮袋放入冰箱平時煮飯用

本來我想去買瓦缸紅片糖, 可惜d雜貨舖無開, 惟有求L其買太古。一磅糖大約係一包加一條, 唔好怕甜!睇落好多, 其實唔係太甜!!

糖切開, 唔好成條落, 亦不用太碎

真係開皮喇!先大火白鑊炒薑!炒到有香味,炒到變黃.左邊好明顯黃咗.

當D薑香咗黃咗就加糖喇!

D糖一開始溶就較中大火

咁樣中大火就唔洗理佢住, 佢大約會滾大半個鐘, 我直頭響隔離打機慢慢等..haaha

間唔中用快子撩下, 等每塊薑都浸淫響糖水懷抱中!

大約大半個鐘之後, d糖開始杰喇, 要較到中火, 慢慢撩下佢

嘩,好驚呀,壓力大爆炸!!!!!堅開始杰啦!!!不過放心, 以我煮糖嘅經驗, 就算變溶岩都未試過彈出嚟!呢個時候較最細火, 繼續撩, 驚佢燶。

開始起沙, 就可以熄火, 用餘溫繼續撩,直到乾。 

乾咗佢就會分開由一餅嘢變一塊塊, 就算無分開用手都好易搣開, 攤開等凍就可以入樽lu!

煮糖嘅好處係就算你整到個廚房好似兇案現場咁

只要加水開火,就咩都一乾二淨!!

d水唔好倒走啊!佢係正宗薑糖水, 好正啊!

咁以後出門口返工戴口罩前含一塊響口, 或者用幾塊沖熱水飲唔知係咪真係咁養生呢?haha...唔理喇話之啦, 好味咪得囉!

一post一貓:

出唔到街無花啊,用dingding頂住先!

dingding身為一個中坑, 雖則老馬有火成日追打我, 但簡唔中都懶可愛嘅...haha...

等食個樣一定最順德人..hahha

玩時都好大唔透!

好攪笑, 其實佢好憎影相, 突然發現我偷影佢, 個表情好似比人捉姦在床咁驚訝中帶點不滿再帶點不羈..hahah